Accessibility links

пәнҗешәмбе, 8 декабрь 2016, Казан вакыты 15:09

Omski ölkäseneñ Kolosovka rayonında tatar xäräkäte


Soñğı yıllarda Omski ölkäseneñ tatarlar tuplanıp yäşägän awıl-rayonnarında tatar mädäniät üzäkläre oyışıp eşli başlawları turında “Azatlıq” tıñlawçılarına citkergänebez bar inde. Kolosovka rayonında da monnan 2 yıl elek mädäniät yortı qarşında milli canlı Ğali abıy Zälilov citäkçelegendä tatar mädäniät üzäge eşläp kitkän ide. Qızğanıçqa qarşı, Ğali abıy waqıtsız wafat bulğannan soñ, üzäkneñ eşçänlege berniqädär sülpänlände. Şulay da, bıyıl yıl başında yaña citäkçe saylap quyılğaç, üzäkneñ eşe qabat canlanış aldı. Uzğan yäkşämbedä mädäniät üzäge xisap cıyılışı ütkärde. Cıyılış barışında yaña citäkçe Äkram Ämirov xalıqnı üzäkneñ eşçänlege häm alda torğan eş plannarı belän tanıştırdı. Annan soñ Äkräm äfände balalar belän eşli başlawların bilgeläp ütte.

Rayonda dini yünäleştä alıp barılğan eşlär belän möselman oyışması räise Wäkil äfände Allyamov tanıştırdı. Ul Kolosovkada mäçet buldıru buyınça eşneñ niçek barışı turında citkerde, alda torğan awırlıqlar turında söyläde. “Mäçet itep tözekländerü öçen elekke kolxoz qaramağında bulğan ber bina sayladıq. Ämma binanıñ kiräkle dokumentları yuq. Alar artınnan küp yörergä kiräk”,- di Wäkil äfände.

Cıyılıştan soñ tatar mädäniät üzäge qarşında eşläwçe “Mäxäbbät” ansambleneñ konsertı buldı. Tamaşaçı här çığışnı cılı qarşıladı. Şunsı da iğtibarğa layıq, zalda utıruçılar arasında rus millätennän bulğan tamaşaçılar da bar ide. “Mäxäbbät” ansamblen rayon mädäniät yortı metodistı Gölsem Ämirova citäkli. Ul kollektivınıñ üzara dus buluın häm berdäm eşläwe turında şatlanıp söyläde.

Saniä Mirxaleeva, Omski

XS
SM
MD
LG