Accessibility links

якшәмбе, 4 декабрь 2016, Казан вакыты 17:20

Başqortstan yazuçılarınıñ XIV qorıltayı açıldı


Ufada comğa könne Başqortstan Yazuçılar berlelegeneñ çirattağı XIV qorıltayı açıldı. Näq menä şuşı çara respublikada könneñ iñ töp waqiğası buldı. Ni öçen digändä, yazuçılar qorıltayına respublikanıñ barlıq yuğarı citäkçeläre dä kilde häm anı tantanalı açu da qatnaştı.



İñ berençe süz, ğädättägeçä, Prezident Mortaza Räximovqa birelde. Qorıltayğa üzeneñ ozın ğına qotlaw çığışında Räximov äfände bügenge köndä dä ädäbiätneñ häm basma süzneñ zur ähämiätkä iä buluın assızıqladı häm Başqortstanda yazuçılar öçen, kitaplar näşer itü öçen zur mömkinleklär buluı xaqında söyläde. Başqa töbäklärdä ädäbi süzgä häm qäläm ähellärenä iğtibar kimegän ber waqıtta Başqortstanda bu mäs'älä gel xakimiätlärneñ ähämiät üzägendä tora, dip bilgeläde Mortaza Räximov.

Qorıltayda töp doklad belän Başqortstan Yazuçılar berlege idäräse räise Rawil Bikbaev çığış yasadı. Ul ike qorıltay arasında uzğan biş yıl eçendä başqarılğan eşlärgä yomğaq yasadı häm bügenge köndäge aktual' mäs’älälärgä tuqtaldı. Dokladtan kürenüençä, äle Başqortstan Yazuçılar berlege äğzası bulıp 217 keşe tora ikän. Alarnıñ küpçelege şağir, annan soñ san buyınça ikençe urında prozaiklar häm öçençe urında dramaturglar kilä. Rawil Bikbaev ike qorıltay arasında niçä yazuçınıñ niçä kitabı çığuı, respublikada niçä yaña jurnal çığa başlawı xaqında centekle söyläde. “Ädäbi protsess caylap qına bara, yazuçılarnıñ maqtap telgä alırlıq äsärläre dä dönya kürä, ämma soñğı waqıtta kitapqa qarata iğtibar kimi, - di Rawil äfände. – Ayıruça yäşlär kitaptan çitläşä. Näşriätlarda ädäbi kitaplar çığaruda da finans qıyınlıqlar ayaq çala”.

Ämma yazuçılarnı kitaplarnıñ az näşer itelüe häm kitap uquçılarnıñ kisken kimüe genä borçımıy. Alarnı bigräk tä üzlärenä qarata iğtibar kimü dä räncetä. Qäläm ähelläreneñ tormış könküreş şartların yaxşırtu, alarğa fatirlar bülü iñ awır problema bulıp qala. Xäyer bügenge köndä kemgä ciñel inde. Yazuçılar da ğomum cämğiätneñ wäkilläre iç inde.

Başqortstan Yazuçılar berlegendä menä un yıldan artıq inde tatar yazuçıları berläşmäse dä eşläp kilä. Anıñ citäkçese, tanılğan tatar yazuçısı Räşit Sabitnı da respublikada tatar ädiplärenä iğtibar az bulu borçıy.

Sabit – Başqortstan tatar yazuçıları dürtär-bişär yıl, xätta unar yıl kitap çığara almıy. Toraq mäs’äläse dä xäl itelmi. Menä tanılğan tatar şağire Möxämmät Zakirov tulay toraq bülmäsendä biş keşe belän bergä yäşi. Anda niçek icat itep bulsın inde. Qısqası, fäqirlektä ğömer itäbez

Başqortstan Yazuçılar berlegendäge tatar yazuçıları berläşmäse citäkçese Räşit Sabit fikerläre buldı.

Mäğlüm buluınça, Başqortstanda Yazuçılarnıñ tağın ber berlege bar. Anısı Räif Ämirov citäkçelegendäge Başqortstan Tatar yazuçıları berlege. Tuqsanınçı yıllar başında uq oyıştırıla başlağan ul berlekne xaqimiätlär tanımadı häm anı räsmiläştermäs öçen, Başqortstanda zur tartqalaş bardı. Un yıldan artıq utızdan artıq mäxkämä utırışlarında qatnaşıp, bu köräştä tatar ädipläre östen çıqtı häm oyışmanı räsmi terkätügä ireşä aldı. Terkätüen terkätte dä ul, ämma bu berlek asılda käğäzdä genä isäplänä. Ni öçen digändä, anıñ ni binası, ni xezmätkärlär totu öçen finansları yuq. Başqortstan Xökümäte aña byudjettan aqçalar bülügä kisken qarşı.

Başqortstan yazuçılarınıñ älege qorıltayı üz eşen şimbä könne dä däwam itäçäk.

XS
SM
MD
LG