Accessibility links

Кайнар хәбәр

Blagoveşçendağı xällärgä bäyle Başqortstan Yuğarı mäxkämäseneñ yaña qararı


Başqortstannıñ Blagoveşçen şähärendä 2004 yılnıñ dekaberendä militsiä häm OMON tarafınnan ütkärelgän maxsus operatsiä häm anda qaza kürgän yözlärçä keşeneñ şikäyätläre buyınça barğan mäxkämä xaqında äledän-äle xäbär itep torabız. Mäğlüm buluınça, militsiä xezmätkärlärenä qarşılıq kürsätkän dip isäplängän öç keşe Blagoveşçen şähäre mäxkämäse tarafınnan xökem itelgän ide. Ber ir-at ike yılğa iregennän mäxrüm itelde, ä tağın ike ir-at ike yılğa iregennän şartlı räweştä xökem itelgän ide.

Ämma ğayeplänüçelär bu qararlar belän riza bulmadı häm alarnı yaqlawçı advokatlar yañadan bu eşne Başqortstan Yuğarı mäxkämäsenä tapşırdı. İnde menä Yuğarı mäxkämäneñ soñğı utırışında Blagoveşçenda militsiägä qarşılıq kürsätkän dip isäplängän öç keşegä qarata çığarılğan xökem qararları döres tügel dip tabıldı. Bu eşlärne qaraw öçen barlıq dokumentlar da yañadan Blagoveşçen şähäre mäxkämäsenä cibärelde. Älege küp şaw-şu quptarğan eşneñ yaña borılış aluı xaqında ğayeplänüçelärneñ advokatı Räis Fäesxanov “Azatlıq” radiosına menä nilär söyläde.

Fäesxanov – Min yaqlağan keşelärneñ ğayepsez ikänlege baştan uq ayırmaçıq kürenä ide. Xäzer bez monı Yuğarı mäxkämädä isbat ittek.

Advokat Räis Fäesxanov süzlärençä, militsiä xezmätkärläre belän tartqalaş kiterep çığarğan dip tanılğan öç keşegä qarata bulğan ğayepläwlärneñ buş süz ikänlege baştan uq mäğlüm ide. Ämma monıñ şulay buluın isbat itü öçen ozaq waqıtlar kiräk buldı. Blagoveşçen şähäre mäxkämäse dä bu eşne tikşerüne törle säbäplär belän suza kilde häm axırda militsiä xezmätkärläre faydasın qayırğan qararlar çığardı. Şulay da, Başqortstan Yuğarı mäxkämäsendä bu eş centekle tikşerelgännän soñ, militsiä belän dömbäsläşü kiterep çığarğan dip isäplängän öç ir-atnıñ ğayepsez buluı açıqlandı. Xäzer inde barlıq dokumentlar da yañadan Blagoveşçen şähäre mäxkämäsenä tapşırılğan häm andağı xezmätkärlärneñ kiläse ğämälläre niçek bulası aldağı un kön eçendä mäğlüm bulaçaq, dilär.

XS
SM
MD
LG