Accessibility links

дүшәмбе, 5 декабрь 2016, Казан вакыты 07:31

Tuqaynıñ 120 yıllığına bağışlanğan çaralar däwam itä


April ayı yaz ayı ğına tügel, tatarnıñ milli uyanu, şiğriät ayı. Bu ayda Ğ. Tuqaynıñ tuuına 120 yıl tulunı bilgeläp ütelä. Ber atnadan, 26 aprildä

Ğ. Tuqaynıñ tuğan könendä zur şiğriät bäyräme ütäçäk. Tatarstanda bu kön “26 april' - tuğan tellär köne” dip iğlan itelgän.

April ayınıñ öçençe atnasında Ğ. Tuqaynıñ 120 yıllığına bağışlanıp ütkärelgän kiçälärneñ berse, 21 aprilda, “Tuqay uquları” belän anıñ isemen yörtkän ädäbi muzeyda däwam itte.

Bu, “Tuqay uquları“n, Tuqay cämğiäteneñ räise, professor Xatip Miñnegulov alıp bardı. Kiçädä süz Ğ. Tuqaynıñ icatındağı islam ahäñnärennän başlanıp, anıñ fänni häm qarşılıqlı fikerläre turında , Ğ.Tuqay belän Ğ. İbrahimov mönäsäbätlärenä Ğ. İsxaqi qaraşı turında bardı, kiçädä zur -zur ädiplärneñ çığışları tıñlandı. Anıñ şiğerläreneñ başqa telgä tärcemäläre turında da bik küp yaña mäğlümat işetelde. Tatar milläten bügenge köndä borçığan mäs'älälär turında da , Tuqaynıñ şiğerläre uquçılarda icadilıq tärbiäläwgä niçek yärdäm itüe turında täcribä urtaqlaşuçılar buldı.

Ä pänceşämbe könne Qazannıñ Sovet rayonında urnaşqan “Säydäş” mädäni üzäge Ğ. Tuqaynıñ 120 yıllığına bağışlap uzdırılğan “Kitap bäyräme ”dä 500 yäş tamaşaçını cıydı. Anda, teatr , bank, elemtä, säwdä yünäleşendä belem alğan yäşlär häm sovet rayonında urnaşqan mäktäplärdän kilgännär balalar aldında Rafail Mostafin, Cäwdät Därzaman , Fäyrüzä Möslimovalar çığış yasadı. “Räweş közgese” dip isemlängän konsert programmasında häwäskär cırçılar, häm “Säydäş” biyu ansamble qatnaştı.

İdel –Press näşriätennän Ğ. Tuqay, M. Cälil turındağı kitaplarnı “Säydäş” üzägendä urnaşqan kitapxanägä büläk ittelär .

Bu, 30 yıllıq tarixı, 2200 uquçısı, häm 102000 kitabı bulğan kitapxanädä “Miras” häm “Sabıyğa” dip isemlängän ädäbi klub eşläp kilä. Xäzerge köndä kitapxanäne Nailä xanım Bikmeeva citäkli.

Ä menä aldağı düşämbedä, yäğni 24 aprilda G. İbrahimov isemendäge tel, ädäbiät häm sänğät institutında böyek şağirneñ 120 yıllığına bağışlanğan “G. Tuqay mirası häm xäzerge zaman” dip isemlängän fänni- ğämäli konferensiä ütäçäk. Bu konferensiägä Rusiäneñ törle şähärlärennän genä tügel , xätta , çit illärdän dä fän eşlekleläreneñ qatnaşuı kötelä. Anda yäş ğalimnärgä dä süz bireläçäk. Ä soñınnan konferensiä materialların tuplağan fänni cıyıntıq çığaru planlaştırıla.

Şulay uq , 24 aprilda BTK BK Mirsäy Ğarifnıñ “Mäñgelek mäxäbbät” dip atalğan kitabın täqdim itü kiçäsenä çaqıra. Kitap Qazanda basılıp çıqtı. Avtorğa şuşı könnärdä 60 yıl tuldı.

Kitapnıñ avtorı - cämäğät eşleklese, Bötentatar Milli Mäcles deputatı, Başqortstannıñ Üktäberskiy şähärendä urnaşqan “Iq” tañnarı regional' ädäbi berläşmäse citäkçese, publitsist Marsel' Ğaripov. Ul bügen bezdä qunaqta.

Xäzer anıñ üzen tıñlıyq äle “ “G.Tuqaynıñ 40 lap mäxäbbätkä, xatın-qızğa bağışlanğan şiğerläre, barısı da tik ber Zäytünägä ğaşıyq buluınnan yazılğandır , digän fiker tua” ,- dide ul.

Sez, “Mäñgelek mäxäbbät” dip isemlängän kitapnıñ avtorı (Mirsäy Ğarifnı) Marsel' Ğariрovnı tıñladığız.

Aldağı könnärdä Qazanda, Tuqayğa bağışlanıp uzdırılğan mädäni çaralar belän, bez sezne äle tanıştırıp torırbız.

Mälikä Basıyr, Qazan.

XS
SM
MD
LG