Accessibility links

якшәмбе, 4 декабрь 2016, Казан вакыты 19:26

"Üzebez" qazanlılarnı tatarça söyläşergä çaqıra


26 aprel'dä uzaçaq Ana tele köne uñayınnan bıyıl Qazanda ayıruça küp häm zur çaralar uza. Läkin küpsanlı şiğer, kitap bäyrämnäre arasında bu yulı şaqtıy üzençäleklese dä bar. Çärşämbe könne Üzebez xäräkäte Min tatarça söyläşäm aksiäsen ütkärergä cıyına. Alar anı Ana tele könenä genä bäylämiçä, däwamlı çara itep uzdırırğa niätli. Läkin anısı äle kiläçäk eşe, ä bügen äydägez 26 aprildä ütäçäk çara turında söyläşep alıyq. Min tatarça söyläşäm aksiäse xaqında tulıraq mäğlümät alu öçen bez bügen Qazan studiäsenä Üzebez xäräkäteneñ koordinatorı Aliä Sabirovanı çaqırdıq.

Bu aksiäne maqsatları - keşelärne niçek tä kübräk tatarça söyläşergä etärü, alarğa berençe adım yasarğa yärdäm itü. Bez beläbez, Qazan mäktäplärendä yıl sayın meñnärçä balalar tatar telen uqıp çığa, alar bit inde nindider däräcädä söyläşä genä alalar. Läkin qazan uramnarında tatarça söyläşüçe yäşlär yuq diärlek. Alarğa üzläreneñ belemen qullanırğa, uramda tatarça söyläşä başlarğa nindider etärgeç kiräk. Bu aksiä alarğa ber etärgeç bulır dip uyladıq bez. Bu ber könlek kenä çara tügel, ul däwam itärgä tieş. Kiläçäktä, mäsälän, kibetlärdä Bez tatarça söyläşäbez digän yazmalar elep quyarğa mömkin bulaçaq. Keşelär monda kilep kergäç tä, monda tatarça söyläşep bula ikänlegen beläçäklär.

Älege aksiä näticäle bulsın öçen bez anı oyıştırğanda zamança ısullarnı qullanırğa tırıştıq. Bez 500 tüştamğa yasattıq. Anda yäşel Ä xärefe häm Min tatarça söyläşäm dip yazılğan. Bez alarnı 26сы könne bezneñ çarağa kilüçelärgä tarataçaqbız. Monnan tış, Üzebez xäräkäte tarafınnan Sineñ berençe 150 tatar süzeñ digän keçkenä genä süzlek tä bastırıldı. Aları inde tatarça belmägän keşelärgä tapşırılaçaq. Monnan tış, Bauman uramınıñ Universitet uramı belän kiseşkän cirdä uzaçaq çarabıznıñ töp öleşendä al'ternativ muzıka konsertı da uzaçaq. Barığız da bezneñ çarağa kilegez, bergäläşep räxätlänep tatarça söyläşik

Aliä Sabirova Azatlıq radiosına 26 aprildä uzaçaq Min tatarça söyläşäm aksiäse turında menä şularnı söyläde.

Gölnaz İlgizär

XS
SM
MD
LG