Accessibility links

җомга, 9 декабрь 2016, Казан вакыты 13:02

Rusiädä “Sabantuy” bäyrämen oyıştıruçılarnıñ uquları başlandı


Şuşı könnärdä Qazanda Rusiä Federatsiä töbäklärendä saban tuyı bäyrämen oyıştıruçılar öçen maxsus uqular ütä. Monda qatnaşu öçen Tatarstan başqalasına millättäşlärebez yäşi torğan töbäklärdän 200 gä yaqın keşe kilde. Älege çaranı Bötendönya tatar kongressı başqarma komitetı häm Mädäniät ministrlığı oyıştıra.

Bu üzençälekle uqular, çönki soñğı yıllarğa qädär ber genä töbäktä dä Saban tuyın ütkärü buyınça, täcribäle belgeçlär şuşı milli bäyrämne oyıştıru texnologiäsen täfsilläp, küp sanlı auditoriägä añlatqannarı bulmağandır. Ä xäzer Saban tuyları 50- 60 lap töbäktä häm däwlättä ütkärelä başlağaç, bu bäyrämneñ forması, mäğnäse häm milli ruxı saqlansın öçen anı oyıştıru belgeçläre kiräklege açıqlandı. Çönki qayber urınnarda Saban tuyın şähär bäyräme, spartakiada dip atalğan kümäkläp cıyıluğa äyländerä başladılar.

Saban tuyın ütkärä torğan töbäktä milli cır, biü, sport uyınnarı tieşle yuğarılıqta oyıştırılmasa, anıñ iseme genä Saban tuyı, ä ciseme kümäkläp eçügä äylänä. Berniçä yıl elek Tatar kongressı, mädäniät ministrlığı, Qazan mädäniät häm sänğät universitetı Saban tuyın oyıştıruçılarnıñ metodikasın äzerläp yaz aylarında uqular oyıştırdılar. Bıyılğı uqular isä sişämbe könne Akterlar yortında açıldı. 180 läp mädäniät xezmätkäre häm yal, sport oyıştıru belgeçläre Rusiäneñ tatarlar yäşi torğan barlıq töbäklärennän kilgän ide. Alar düşämbe könne Qazanğa cıyılıp kunakxanägä urnaştılar häm Çuaşiäneñ “Mişär” fol'klor- estrada ansambleneñ çığışın qaradılar, ä kiçen kongress binasında Marsel' Garipovnıñ Tuqay mäxäbbäte turındağı kitabınıñ täqdim itü kiçäsendä buldılar. Uqularnıñ berençe könendä täcribäle mädäniät xezmätkärläre şäkertlärgä äylänep, çığış yasawçılarnı tıñlap barsın da bäynä – bäynä terkäp bardılar.

Töşke aştan soñ inde qunaqlar Sabantuy bäyrämen Rusiä töbäklärendä uzdıru täcribäse belän dä urtaqlaştılar. Älege uqular atna axırına qädär däwam itäçäk. Aldağı könnärdä qunaqlar Ğabdulla Tuqaynıñ 120 yıllığına bağışlanğan çaralarda, Tuğan tel bäyrämendä dä qatnaşaçaq.

Gölnaz Şäyxetdin

XS
SM
MD
LG