Rusiä İslam universitetı tiräsendä gawga tunırğa ölgermi. İnde, respublika räsmiläre tırışlığı belän, bu uqu yortına citäkçe itep fän keşese İldus Zahidullin bilgelängäç, ul tawış tınmadı, ä kiresençä yaña ber forma aldı. İsegezgä töşeräbez, Rusiä İslam universitetı älegä qädär dini uqu yortı sanalıp kilde. Respublika räsmiläre, bu uqu yortın dönyawi, yäğni inde respublikanıñ räsmi ideologiäsenä äylänä barğan cäditçelekneñ töp fänni bazası itep yasarğa niätläde. Tatar zıyalıları monı qabul itte. Çönki, älegä qädär, tarixçı yäki fälsäfäçe ğalimnär genä cäditçelek kebek unikal' küreneşne öyrändelär. Ä anıñ mömkinleklären xäzerge zamanda qullanu, üsterü eşe başqarılmadı. Rusiä islam universitetı monı buldıru öçen ber mömkinlek birä digän qaraşta tordılar zıyalılar. Älegä qädär, möfti Ğosman İsxaqi citäkläde bu uqu yortın. Häm ul barı tik dini genä bulıp kilde. Universitetnı oyıştıruçılar, yaña rektor itep İldus Zahidullinnı bilgelägäç, Ğosman İsxaqi tuplağan qumanda kirelänä başladı. Bu könnärdä genä uqu yortınnan kitäbez dip 21 uqıtuçı ğariza yazğan. Ğosman İsxaqi çorında RİUda dini fännär kafedranı citäklägän Ruslan Tahirov söyli
Ruslan Tahirov süzlärennän añlaşılğança, RİUda dini fännär qısqarğan. Azayğan. RİUnıñ 82 studentı da, Şäymievqa möräcäğät belän çıqtı. Anda alar RİUnı dini uqu yortı bularaq saqlap qalırğa yärdäm itülären sorıylar. Şulay bulmağan oçraqta, uqu yortın taşlap kitäbez dip belderdelär.
Ruslan Tahirov, RİUnı inde dini genä uqu yortı itep saqlap qalu mömkinlege bulmağanın yaxşı añlıy. Şuña kürä, universitetnı taşlap kitüçelär yaña uqu yortı oyıştırırğa bulğannar.
Şulay itep, 3 mayda, Tatarstan Diniä näzaräte häm Rusiä möftiläre Şurası, Qazanda yaña dini institut qazan İslam institutın açırğa ixtıac barmı-yuqlığın tikşerä. Ä Qazanda, RİUnı sanamağanda, ike Yuğarı mädräsä eşli inde. Berse Möxämmädiä, ikençese İslam qabul itügä 1000 yıllıq isemendäge mädräsä. Möfti Ğosman İsxaqi RİUda rektor bulıp torğanda, qayber matbuğat çaraları, uqu yortında tatar tä'sirenä qarağqnda, kosmopolit ğäräp islamı tä'sire kübräk dip yaza tordılar. Yaña uqu yortı barlıqqa kilsä. Ul nindi bulır, äle äytü qıyın. Härxäldä, mullalar äzerläwçe tağın ber uqu yortı bulaçağı açıq.
Ä xäzerge rektor, İldus Zahidullin isä, eştän kitüçe uqıtuçılarnı uñay küreneş itep bäyäli. Kitüçelärneñ kübese diniä näzarätendä eşläwçelär, alar xezmät xaqın ğına RİUdan alıp yatqannar di. Monnan tış, kitüçelärneñ kübese texnik bülektä eşläwçelär. Menä yaña ike urınbasar da bilgelängän. Alar çit illärdä yuğarı islam belemen alğan keşelär Nurislam İbrahimov häm Möxämmät Murat. İldus Zahidullin süzlärenä qarağanda, eştän kitüçelärneñ qayberläre çınlıqta monda eşlämägän, ä xezmät xaqın ğına alıp yatqan. Yuğarı dini beleme bulğannar isä, tübän eşlärdä eşlägän. Mäsälän, kitapxanäçe bulıp eşlägän, yuğarı dini beleme bulğan keşene İldus Zahidullin kilgäç kenä, uqıtuçı itep bilgelägännär. İldus äfände, RİUda eşlärlek kadrlar bar, läkin alar waqıtında qullanılmağan ğına.
Räfis Cämdixan
