Accessibility links

чәршәмбе, 7 декабрь 2016, Казан вакыты 11:53

BR Tatar ictimaği üzäge östennän çirattağı mäxkämä utırışı ütte


Ufanıñ Kirov rayonı mäxkämäsendä Başqortstan Tatar ictimaği üzäge eşçänlegen tikşerü buyınça çirattağı utırış bulıp ütte. Şuşı utırışta BR Tatar ictimaği üzäge räise Ayrat Ğiniätullin qatnaştı. Ämma anı ğäepläwçe yaq, yäğni Rusiä Yustitsiä ministrlığınıñ Başqortstan buyınça idäräse wäkilläre kilmäde bu utırışqa. Şulay itep, tağın da Tatar ictimaği üzäge eşçänlegen tikşerü kilep çıqmadı. Sud''ya xanım barı tik Ayrat Ğıyniätullinğa qayber açıqlıq kertü sorawları birü belän genä çiklände.

Elegräk tä xäbär itelüençä, Rusiä Yustitsiä ministrlığınıñ Başqortstan buyınça idäräse BR Tatar ictimaği üzägen yabu eşen qaraw öçen, näq menä Ufanıñ Kirov rayon mäxkämäsenä möräcäğät itkän ide. «Bezneñ oyışmağa qarata aldan uylanılğan höcüm başlanğanlığı berençe tıñlawlar barışında uq añlaşılğan ide, – di Ayrat Ğiniätullin. – Bezne yañadan räsmi terkälü ütmäwdä, şulay uq uzğan yıldağı eşçänlegebez turında xisap tapşırmawda ğäeplädelär. Ämma bezgä tağılğan «gönahlar» ışandırırlıq tügel ide häm bez bu eşne respublika Yuğarı mäxkämäsenä tapşırdıq. Ä Yuğarı mäxkämä bu eşne yañadan qaraw öçen kire Kirov rayonı mäxkämäsenä qaytardı”.



Ayrat Ğiniätullin äytüençä, Başqortstan Tatar ictimaği üzäge eşçänlegen yabarğa tırışu uzğan yılnıñ may ayında uq başlanğan ide. Dimäk, tizdän bu xälgä ber yıl bula. Mäxkämäneñ kiläse utırışı 17 mayğa bilgelände, dip xäbär itte Ayrat Ğiniätullin. Şul uq waqıtta Başqortstan Tatar ictimaği üzägen yañadan terkätü öçen östämä dokumentlar tapşırılğan. Alay ğına da tügel, Kirov rayonı mäxkämäsenä Ayrat Ğiniätullin BR Yustitsiä idaräsenä qarata üze dä qarşı mäxkämä eşe açu öçen şuşı könnärdä tieşle käğäzlärne tapşıraçağın äytte.

XS
SM
MD
LG