Accessibility links

Кайнар хәбәр

Omskinıñ “Umırzaya” ansamble Qazanda çığış yasap qayttı


Şimbä könne Omskinıñ «Umırzaya» tatar-başqort xalıq fol'klor ansamble Qazannan äylänep qayttı. 37 keşedän torğan kollektiv Tatarstannıñ başqalasına Bötendönya tatar kongressı başqarma komitetı çaqıruı buyınça barğan ide. «Umırzaya» üzeşçännäre anda söyekle şağirebez Ğabdulla Tuğaynıñ 120 yıllığı uñayınnan oyıştırılğan çaralarda, Rusiäneñ törle töbäklärendä «Sabantuy» bäyrämen oyıştıruçılar seminarında qatnaştılar häm älege çaralar qısalarında Kärim Tinçurin isemendäge teatr binasında «Seberem minem-bişegem minem» digän konsert programması belän çığış yasadılar.

Bu xaqta «Azatlıq» radiosında da xäbär bulğan ide inde. Omski üzeşçännäreneñ çığışın qararğa xalıq küpläp kilgän ide häm äytergä kiräk, tamaşaçı konsert programmasın cılı qabul itte. Küplärneñ küñelenä konsertta yañğırağan seber tatarları cırları xuş kilde. «Umırzaya» ansamble üzeşçännäre üzläre dä Qazanda yasağan çığışlarınnan qänäğät qaldılar. Alar öçen bu çığış – cawaplı imtixan da, üzençälekle köç sınaw da buldı.

Kollektiv öçen, ayıruça Qazanğa berençe märtäbä kilüçelär öçen, bu säyäxät ontılmaslıq xislär tudırğan. Küñellärendä tuğan xisläre belän Omskinıñ üzeşçän artistları ber-ber artlı büleştelär. Alar üzläreneñ Qazan belän soqlanuları, Qazan tamaşaçısı aldında ğorurlanuı turında söylädelär. Bu alarğa kiläçäktä tağın da zurraq ürlär yaulau öçen etärgeç buluı turında belderdelär. «Umırzaya» ansamble qarşında şöğellänüçe «Ömet» törkeme balaları da Qazan belän şaqqatuları turında äyttelär.

Mäğlüm bulğança, Ğabdulla Tuqaynıñ 120 yıllığı uñayınnan oyıştırılğan çaralar qısalarında Rusiäneñ törle töbäklärendä «Sabantuy» bäyrämen oyıştıruçılar seminarı ütkärelde. Omski ölkäsennän älege seminarğa maxsus ike keşe – Tara şähärennän andağı Tatar mädäniät üzäge metodistı İldar Mamatov häm Bol'şereç'ye rayonı Ülänkül awılınnan alda bulaçaq Sabantuyınıñ oyıştıru komitetı äğzası Cämilä Çumarova buldılar. Omski ölkäsendä milli bäyrämebezneñ bıyıl ölkä külämendä bulmasa da Ust'-İşem rayon üzägendä, Tara rayonınıñ İşäy häm Bol'şereç'ye rayonınıñ Ülänkül awıllarında ütkärelergä tieşlege turında äytep ütü dä urınlı bulır. İyün ayında uzdırılaçaq bu sabantuylarğa inde äzerlek eşläre başlandı. Ä inde Qazanda seminarda alğan belemnär anı oyıştıruçılarğa älbättä zur yärdäm bulaçaq dip uylarğa bula. Seminarda qatnaşqan İldar Mamatov ta şulay dip fiker yörtä.

Rozaliä Sayganova häm Saniä Mirxaleewa, Omski

XS
SM
MD
LG