Accessibility links

якшәмбе, 4 декабрь 2016, Казан вакыты 13:24

Başqortstanlılar bäyräm itä


1nçe may - Yaz häm xezmät bäyräme. Barlıq rusiälelär kebek başqortstanlılar da bu könne yal itte. Respublikanıñ rayonnarında, şähärlärdä älege bäyräm uñayınnan törle mädäni çaralar uzdı. Başqaladağı töp bäyräm Mäcit Ğafuri isemendäge yal häm mädäniät parkında uzdı. Anda respublikanıñ bilgele artistları tarafınnan zur konsert kürsätelde.

Başqala kommunistları här yıldağıça tantanalı yöreş häm uram cıyını uzdırdılar. Tantanalı yöreş başqalanıñ Sport sarayı yanında başlanıp, Lenin mäydanına qädär däwam itte. Anda 150gä yaqın keşe qatnaştı. Artaban kommunistlar Lenin häykälenä çäçäk saldılar häm zur bulmağan uram cıyını uzdırdılar. Cıyında töp çığışnı Ufa kommunistları başı Radmir Yangirov yasadı. Ul xakimiättä utıruçılarnı il häm xalıq baylığın urlawda ğayıpläde. İrtäme-soñmı ğädellek urnaşaçaq dip ışandırdı.

Radmir Yangirov xalıqqa “Provinsial'nıye vesti” gäzite möxärrireneñ qulğa alınuın ireşterde. Uram cıyınında qatnaşuçılar gäzit möxärrire Viktor Şmakovnı azat itüne taläp ittelär. Viktor Şmakov 29nçı aprel' könne iminlek xezmäte tarafınnan üzeneñ fatirında qulğa alınğan ide. Ul gäzite aşa xalıqnı xakimiätne bärep töşerergä çaqıruda ğayıplänä. Ufanıñ Kirov rayonı mäxkämäse eş tikşerelgänçe anı ike ayğa iregennän mäxrüm itü turında qarar çığardı.

Cämäğätçelek oyışmaları, firqä bülekçäläre dä bäyräm çaralarında qatnaştı. “Berdäm Rusiä” firqäse äğzaları Ufa sirkı binası yanında cıyılıp, firqä atributları töşerelgän bayraqların bolği-bolği Mäcit Ğafuri parkına yunäldelär. Alar artınnan cıyılğan ”Rusiä patriotları firqase” äğzaları isä bu ssenariynı qabatlıy almadı. Militsiä alarğa bayraqların yäşerergä quştı häm mäydanğa cıyılıp barunı tıydı.

XS
SM
MD
LG