Accessibility links

шимбә, 10 декабрь 2016, Казан вакыты 15:55

“Azatlıq”nı tıñlaw yulın härkem üzençä saylıy


Şuşı könnärdä “Azatlıq” radiosınıñ Qazan bülegenä Tömän ölkäsennän İbätullin Minzat isemennän xat kilde. Bu xatnıñ eçtälege tübändägeçä. “Säğätlärne cäyge waqıtqa küçergäç, “Azatlıq” radiosınıñ yışlıqları üzgärde. Şunlıqtan “Azatlıq” radiosın 25 metrlı qısqa dulqında tıñlawı bik qıyın. Ber dulqında öç radiostansiä ber – bersenä totaşa. Qış könnärendä bik yaxşı işetelä ide. Bu xällär yıl da qabatlana. Ägär dä “Azatlıq” härwaqıt ber ük yışlıqlarda qalsa yaxşıraq bulır ide. Ä bit üzbäk, qırğız, ukrain, belorus tellärendä “Svoboda”nıñ qısqa dulqınnardağı tapşıruları äybät işetelä. Ä bez Seberdä yäşäwçelär “Azatlıq” radiosın qısqa dulqınnardan ğayre tıñlıy almıybız. Çönki bezdä cirle radio dulqınnarı aşa retranslyatsiä köylänmägän häm İnternet aşa tıñlaw mömkinlege dä yuq. Zinhar çarasın küregez!”.

Xörmätle tıñlawçılar, Mondıy xatlar “Azatlıq” nıñ Qazan bülegenä yış qına kilep tora, şaltıratuçılar da küp. “Azatlıq” nı tıñlarğa tezläwçelär küp, ä mömkinleklär azraq, çönki teläsä kem ciñel genä qısqa dulqınlı yışlıqlarğa radioalğıçın köyli almıy.Andıy radioalğıçlar siräk oçrıy häm alar belän eş itü öçen täcribä kiräk. Tatarstanda yäşäwçelärneñ ber östenlege bar, alar FM dulqınnarında eşläwçe Yaña ğasır radiosında kiçke säğät 9 da häm irtänge säğät 5 tä tıñlıy alalar. Çiläbedä “Kontitental'” radiosında kiçke säğät 9 da 67.5 metr yışlıqta “Azatlıq” tapşıruları efirğa çığa. Cirle radio aşa “Azatlıq” tıñlaw sıyfatlı häm uñaylı. Ämma barıber iñ universal' häm ışanıçlı ısul qısqa dulqınnar. Näq menä şuış dulqınnar yärdämendä salqın suğış yıllarında mäğlümat irege qısılğanda meñnärçä möstäkıyl' fikerle keşelär üzlärenä kiräkle fikerne kötep alğannar. Xätta maxsus caylanmalar yärdämendä tapşırularnı tomalağan çaqlarda da “Azatlıq” tan ayırılmağan tıñlawçılarıbız äle dä oçrap tora. Minzat äfändeneñ yışlıqlar alışmıyça daimi ber ük dulqında qaluı kiräklege turında äytüe bik döres, ämma texnik säbäplär arqasında qısqa dulqınnar qışqı häm cäyge waqıtqa küçkändä alışıp tora. Bu tıñlawçılarnı yuğaltuğa kitersä dä berni eşläp bulmıy. Dimäk, yazın häm közen yaña yışlıqlarnı iğtibar belän yazıp alıp tieşle waqıtta alarnı tıñlarğa turı kilä. Mäşäqätle häm qıyın bulsa da, bik telägän keşe cayın taba.

Qabat isegezgä töşeräbez. “Azatlıq” radiosınıñ tapşıruların kön sayın berniçä yul belän tıñlap bula. Äytik, 25 metrlı qısqa dulqınnarda, Tatarstan waqıtı belän irtänge säğät 7 dä, 9 da, kiç belän säğät 7 häm tönge säğät 11 dä 31 metrlı qısqa dulqınnarda ber säğät däwamında işetä alasız. Şulay uq “Azatlıq” radiosın FM dulqınnarda, “Yaña ğasır” radiosı efirında işetä alasız. (Äbsäläm – 105.3 FM; Azat – 104.3 FM; Aznaqay – 107.1 FM; Apas – 104.4 FM; Ätnä – 71.42 FM; Aqtanış – 103.1 FM; Bazarlı Mataq – 107.1 FM; Bawlı – 107.5 FM; Bilär – 101.4 FM; Bolğar – 106.0 FM; Bögelmä – 101.7 FM; Zäy – 106.6 FM; Yäşel Üzän – 100.9 FM; Trud – 107.9 FM; Qadıbaş – 105.2 FM; Qama Tamağı – 71.51 FM; Quqmara – 107.9 FM; Qotlı Bökäş – 104.9 FM; Qoşman – 105.0 FM; Leninogorsk – 102.1 FM; Mamadış – 106.2 FM; Minzälä – 107.3 FM; Möslim – 100.0 FM; Yar Çallı – 105.5 FM; Tübän Qama – 102.6 FM; Tübän Şuban – 105.0 FM; Yaña Çişmä – 107.0 FM; Sirenkino – 72.28 FM; Sarman – 107.8 FM; Teläçe – 106.1 FM; Çistay – 103.0 FM; Şämärdän – 102.3 FM; Yamaş – 72.89 FM.)

Gölnaz Şäyxetdin

XS
SM
MD
LG