Sayra xanım Vel'şakova isän çaqta yıl da Tuqay kiçäläre uza ide. Bıyıl, yubiley yılı bulsa da, kiçädän mäxrüm qaldıq.Ä yäşlär öçen Rinat Väliev, soñlabraq bulsa da, Tuqay iseme belän bäyle üzençälekle ber çara ütkärde: skul'ptor Äxnäf Ziäqäyevnıñ ostaxanäsenä alıp bardı. Ni öçen disezme? Peterburgta Zverinskaya uramında quyılaçaq Tuqay häykälen tamaşa qılırğa.
Äytkändäy, Tuqay häykäle turında süz inde dürt yıllap bara. Başta şağirneñ byustın ğına Qazan büläk itärgä tieş ide 300 yıllıqqa büläk itelgän yözlärçä häykällär rätendä. Häm ul byust Neva prospektı tiräsendä, Voronixin räşätkäse yanında quyılırğa tieş ide- urın tabılmadı. Annan Petrograd yağında- tatarlar şähärneñ berençe könnärennän ük kümäkläşep yäşägän - mäçettän yıraq tügel urında quyarğa qarar ittelär “Mäçet tiräsendä sın quyarğa yaramıy”, - dip üzebeznekelär ük tawış çığarğaç, ul byust bötenläy quyılmıy qaldı.
Bıyıl, yubiley yılında, ul soraw yañadan quzğatıldı. Peterburg skul'ptorı Äxnäf Ziäkaev soavtor itep Yan Neymannı alğaç alarğa Tuqay häykälen eşlärgä röxsät itelä. Bügen häykälneñ balçıqtağı variantı inde äzer, bronzadağısı ber-ike aydan äzer bulaçaq dilär. Häykäl bergälär Cäyge baqçada torğan Krılov häykälen xäterlätä: postament tiräli Tukay äsärläre personajları (şürälelär, su anası, käcä, sarıq häm başqalar) urnaşqan.
Sulış aluı qıyın şağir ber qulın kükrägenä quyğan,ikençe qulında kitap
Peterburg yäşläre bulaçaq häykälendä berençe tamaşaçıları buldılar inde.
Ä inde ostaxanädä sorawlar yawdıruçı yäşlär buldı. Skul'ptornıñ eşe nidän, niçek başlana, nindi texnikada eşlängän, nindi qıyınlıqlar oçrağan? Äxnäf Ziäkaev berençe tamaşaçılarınıñ bar sorawına da bik teläp cawap birde.
Boyırğan bulsa, iyün azağında, Peterburg sabantuyı könnärendä telägän keşe şağirne kürergä kilä alaçaq.Urını ğına böyek şağir öçen bik ük maqtawlı tügel inde: balalar baqçasınıñ uyınnar mäydançığı. İkençe yaqtan qarağanda, ”Şürälesen”, “Su anasın” rus balaları da belgän şağirgä bala-çağa çırqıldaşuı arasında bik ük küñelsez bulmas, şayät. Annan xalıqta, bu baqçanı bezneñ balalarğa birerlär, bälki, digän ömet tä yäşi.
Gölzadä Kamalova, Sankt-Peterburg
