Accessibility links

шимбә, 3 декабрь 2016, Казан вакыты 18:48

RİUda yaña rektorğa qarşı piket uzdı


Qazanda islam dine buyınça yuğarı belem alırğa mömkin bulğan berniçä mädräsä bar. Nigezdä alar mäxällälär öçen din ähelläre äzerlilär. Anda uquçı şäkertlär, studentlar da törle. Ul, törlelek, qaysı töbäktän buluınnan da tora, nindi şähär yäki awıldan da häm belemnän dä. Rusiä İslam universitetına, andağı wäzğıätne küzätergä barğaç, ber 19 yäşlek student belän söyläşäm. Yaña citäkçelek kilügä riza tügel, yeget. Yaña citäkçelek universitetnı dönyawi itmäkçe ikän. Tatar tele, kampiter öyränü kebek fännär älegä qädär dä bulğan, citä bit inde bu dönyawi fännär bezgä di. Menä, dip däwam itte süzen, universitet studentı, äle Rusiäneñ ğailä kodeksın uqıp yatam, ni pıçağıma kiräk ul bezgä, böten äyber Qor’ändä bar bit, ğailä kodeksı da şul isäptän di. Bez bit möselman däwlätendä yäşämibez, bu il qanunnarın da belü kiräkter inde digän sorawım, buş diwarğa ğına bärelde. Student añlamadı.

Ä şuşındıy studentlar inde ike atna buyına, Rusiä İslam universitetına. Uqu yortın oyıştıruçılar yaña rektor bilgeläw belän riza bulmıyça, qarşılıq kürsätep yatalar. Däreslärgä yörmilär, ä ostazlarınıñ qayberläre, tögälräge 24 eştän kitkän. Säbäp ber, yaña citäkçe İldus Zahidullin kilgäç, din däresläre azaya. Çärşämbedä studentlar ğına tügel, berniçä distä qarçıq ta, Universitet qarşında piket uzdırdı. Taläp ber, RİUnı dini uqu yortı bularaq saqlap qalu. Uqu yortı qarşında, Mintimer Şäymievtan yärdäm sorap imza cıyu bara. Qähärlängän qaharman da bar - Prezidentnıñ säyäsät buyınça kiñäşçese Rafael Xäkimov. Ul ğına tırıştı bu islam uqu yortın beterergä, Yevroislam uqıtırğa teli. Xalıq fikere menä şundıy. Qarşılıq çarasında Möslimä xatın qızlar oyışması citäkçese Älmira Ädiätullina qatnaşa

Audio

Ä menä Almaz isemle yeget, elek RİUda uqığan, xäzer aqça kiterä torğan eşen taşlağan. Niäte, RİUnı dini uqu yortı bularaq saqlap qalu. Şul ğämäl öçen eşennän kitkän. Anıñ belän söyläşäbez.

Audio

Piket üzenä kürä ber uram cıyınına äylänep qaldı. Xalıq, törkem-törkem bularaq, yaña rektor İldus Zahidullinnı sügä. Rafael Xäkimovnı qarğıy. Elekkege rektor, möfti Ğosman İsxaqinı maqtıy.

Menä şundıy söyläşülärdän soñ, rektor yanına keräm. Zallar buş. Uqu barmıy bit. Rektor İldus Zahidullin isä, uqu barmawnı üzençä añlata. Bezdä yallar di. Uzğan aylarda, keşelär törle bäyrämnärdä yal itkändä, RİU şäkertläre uqığan, menä xäzer may başında yal itälär, 10 da uqular başlana. Rektor şulay añlata. İldus Zahidullin belän kilep tuğan wäzğıät turında söyläşäbez.

Audio tapşıruda

Sez, Rusiä İslam universitetı rektorı İldus Zahidullin belän äñgämä tıñladığız. Rektordan çıqqanda, qarşılıq aksiäsendä qatnaşuçılar taralışqan ide inde.

Bu uqu yortı häm andağı wäzgyät turında yal könnärendä Azatlıqta maxsus tapşıru da bulır.

Räfis Cämdixan

XS
SM
MD
LG