Accessibility links

чәршәмбе, 7 декабрь 2016, Казан вакыты 19:26

Rämil Xäbriev: Rusiä yasalma darulardan saqlanmağan


Başta şunı äytik, Rusiäneñ sälämätlek saqlawnı tikşerüçe oyışmanı citäklägän Rämil Xäbriev Tatarstan keşese. Üz zamanında respublikada deputat wazıyfasın ütäp, xäzer inde ul il xalqınıñ sälämätlegen qayğırtuçı oyışmanıñ başlığı. Rusiä xalqı darularnıñ qimmätlänüenä, taşlama belän birelergä tieşle darular xaqında bik zarlana. Bu böten ildä şulay. Şul isäptä Tatarstanda da.

Darularnıñ qimmätlänüen ğadi xalıq üz kesäsendä bik yaxşı toysa da, Rusiäneñ sälämätlek saqlawnı tikşerü oyışması citäkçese xällär alay uq naçar tügel dip sanıy. Uzğan yılda benzinğa bäyälär 16%qa, aşamlıqqa 9,6%qa, ä darularğa 5%qa ğına artqan. Rämil Xäbriev isä darularğa xaqlar nığraq artır dip uylağan. 2005 yılda taşlama belän qullanuçılarnı darular belän tä'min itü federal' programmasın qabul itkändä. Ämma Xäbriewneñ farazları bik ük tormışqa aşmağan, çönki älege federal' programmağa byudjettan 50mlrd sum aqça bülengän. Darularğa bäyälärneñ nıq artmawın Rämil Xäbriev tağın şirkätlärneñ inde quyılğan bäyäne kinät kütärä almawı belän dä añlata.

Taşlama belän qullanuçılarğa isä 2006 yılda darular citmäskä mömkin digän farazlar da bar. Bu xaqta Rämil Xäbriewneñ fikere mondıy. Çınlap ta andıy qurqınıç bar. Tabiplarnıñ awıruğa torğan sayın kübräk darular yazuı belän bäyle bu. Ämma şuña da qaramastan bez sıyfatlı qimmät darularnı kimetergä cıyınmıybız di Rämil Xäbriev. Ekonomiä maqsatınnan alay uq populyar bulmağan darularnı bik qimmätle bulmağan, ämma yaxşı sıyfatlı daruğa alıştırunı isä küzdä totabız.

Tağın ber möhim problema - yıraq awıl-rayonnarda yäşäwçelärne darular belän tä'min itü. Bu könnärdä Däwlät Dumasında da älege mäs'älä qaralğan. Anda darularnı rayonnan awılğa xat taşuçı da kiterä ala digän mäğnäsez täqdimnär dä yasalğan. Sälämätlek sağında toruçı Rämil Xäbriev isä tägärmäçle aptekalar oyıştırırğa kiräk dip sanıy. Monıñ öçen aptekalarğa röxsätnämä birergä häm alar barlıq awıllarnı da kiräkle darular belän tä'min itäçäk, di Rämil Xäbriev. Ämma inde tege yäki bu awılğa barır öçen yul salınmağan bulmasa, bu mediklarnıñ probleması tügel di ul.

Yasalma darular xaqında Rämil Xäbriewneñ fikere mondıy. Nigezdä çit il daruları yasalma bula. Soñğı yıllarda yasalma darularnı tabu oçraqları kimegän di ul. Ämma alarnı darular bazarınnan ğomumän aldıru mömkin tügel di. Çönki Rusiädä yasalma darular çığaruçılarğa qarata xoquq matdäse yuq.

Al'bina Zäynulla

XS
SM
MD
LG