Accessibility links

якшәмбе, 11 декабрь 2016, Казан вакыты 15:06

RosUkrEnergo xucaları turında tulı bulmağan açıqlawlar


26-nçı aprildä Gazprom Media qaramağındağı İzvestia gazetı RosUkrEnergo şirkätennän kerem aluçı 2 yäşeren tarafnıñ isemnären atap mäqälä bastırdı. Şwetsariädä terkälgän RosUkrEnergonıñ yartısına Gazpromğa xuca. İkençe yartısınıñ kemnärgä qarawı moñarçı bilgele tügel ide. Ämma isemnärneñ ataluı mäs''älägä tulı açıqlıq kertmäde häm xätta yaña sorawlar barlıqqa kilde.

Ukrainanı Rusiä häm Törkmänstannan tabiği gaz belän tä''min itüçe bu şirkät ayıruça zur iğtibar cälep itep kilde.

2005-neñ ğinwarında Yulia Timoşenko premyer ministr bulğaç Ukraina İminlek Xezmäte SBU qalğan 50 protsent xissäläreneñ kemnärgä qarawın açmağan RosUkrEnergonı tikşerä başladı.

Ämma soñraq tikşerü tuqtatıldı. 2005-neñ sintäberendä Timoşenko wazıyfasınnan töşerelgäç prezident Viktor Yuşçenko tikşerüne tuqtatırğa quşqan digän xäbärlär buldı. Berniçä ay soñraq isä, Ukraina belän Rusiä arasında gaz bäyäläre turında bik qatı satulaşulardan soñ RosUkrEnergo Urkainağa Rusiä häm Törkmänstan gazın satuçı aradaşçı itep bilgelände. Ukraina xökümäte RosUkrEnergonıñ Ukrainadağı rolen Mäskäw Kremle bilgelände dip belderde.

İzvestiä RosUkrEnergo xucaları mäs''äläsenä açıqlıq kertsä dä bu şirkät turındağı küp kenä bik möhim sorawlar külägädä qaldı, häm xätta yañaları barlıqqa kilde.

Mäqäläne Vladimir Berejnoy isemle jurnalist imzalağan. Ämma çınlıqta Rusiädä andıy jurnalist bulmasqa oxşıy. Moscow Timesnıñ 27-nçe aprel sanında basılğan xäbärgä qarağanda, mäqäläne şundıy psewdonim belän İzvestiäneñ berär xezmätkäre yazğan. Häm ul anı Gazprom wäkile tapşırğan, RosUkrEnergonıñ moñarçı mäğlüm bulmağan xucaların atawçı PriceWaterhouseCoopers şirkäte ütkärgän audit xisabı belän tanışudan soñ yazğan. Moscow Times Vladimir Berejnoy digän jurnalist yuq dip yasa.

Moñarçı yäşeren bulğan xucalar Dmytro Firtaş belän İvan Fursin isemle Ukraina watandaşları dielä. İzvestiä yazuınça, RosUkrEnergonı täşkil itüçe, Awstriädäge Centragas şirkäte xissäläreneñ 90 %na Firtaş, 10%na Fursin xuca.

Reiffeisen Bank mäğlümätlärenä qarağanda, bıltır RosUkrEnergo 500 million dollar tabış alğan. Şunıñ yartısı Centragasnıñ yäşeren xucalarına, qalğan yartısı Gazprom Bankka kitkän.

Gazprom üze tözergä yardäm itkän şirkätneñ xucaları kem buluın belgänme digän soraw tua. Gazprom süzçeläre daimi räweştä bez Centragas xucaları kem buluın belmibez dip täqrarlap kilde. Urkaina yağı isä Gazpromnıñ kem belän eş itüen belmi torıp küpmilliardlı kileşü tözüe aqılğan sıymaslıq xäl di. Ukraina İminlek Xezmäteneñ bu eş belän şöğellängän elekke tikşerüçese Azatlıq radiosına "Alar uz ixtiacları öçen kiräkle aqçalarnı bu şirkät aşa yuuçı Çeçen terrorçıları da bula ala ide, Gazpromnıñ äytkännäre ışanırlıq tügel dide.

Firtaş belän Fursinnıñ isemnäre PriceWaterhouseCoopersnıñ Şwetsariädäge bülege RosUkrEnergonıñ 2004 iyüldän alıp 2005 dikäbergä qädär eşçänlegen tikşergännän soñ açılğan. Tikşerü näticäläre Gazpromğa bu yılnıñ 31-nçe martında tapşırılğan.

3 atna soñraq isä alarnıñ isemnäre İzvestiädä basıldı. Aña qädär Wall Street Journal AQŞ Yustitsiä ministrlığınıñ oyışqan cinayätçelekkä qarşı köräş bülege RosUkrEnergonıñ eşçänlegen tikşerä başladı dip xäbär itkän ide. Austriä kiñküläm mäğlümät çaraları xäbär itüençä, AQŞ räsmiläre Vienağa barıp bu mäs''älä turında Austriä bank häm xökümät räsmiläre belän söyläşkän, RosUkrEnergo räsmiläre isä söyläşülär öçen Waşingtonğa çaqırılğan.

İzvestiä mäqäläse AQŞ tikşerüçelären tübänsetü ruxında, amerikan xoquq saqlaw räsmiläre kiräkmägän cirgä tıqşına digän fiker belän yazılğan.

Ukrainskaya Pravda internet säxifäsendä isä moñarçı mäğlüm bulmağan isemnärneñ ataluı bolay dip añlatıla. Gazprom AQŞnıñ RosUkrEnergonı tikşerüendä aqça ezennän baru Gazpromnıñ yuğarı räsmilärenä, häm Rusiä belän Ukrainadağı elekke häm xäzerge kürenekle räsmilärgä kiterer dip qurıqtı dielä.

Rusiä belän soñğı gaz söyläşüläre öçen cawaplı bulğan elekke Ukrain tışqı eşlär ministrı urınbasarı Oleksandr Çaliy Moscow Timesqa Firtaş belän Fursin RosUkrEnergonıñ çın xucaları tügel dip belderde. Firtaş çılbırnıñ axırında tügel, başında ğına tora. Häm ul Ukrainadağı iñ yuğarı citäkçelek öçen zur cäncalnıñ başında da tora di Çaliy.

Ukrainskaya Pravda internet säxifäse yazuınça İzvestiä aşa mäğlümät çığarunıñ maqsatı AQŞ Yustitsiä ministrlığı tikşerüenä qarşı çara kürü häm axır çiktä tikşerü çın xucalarğa artıq yaqınaymasın öçen anıñ yabıluına ireşü.
XS
SM
MD
LG