Accessibility links

дүшәмбе, 5 декабрь 2016, Казан вакыты 23:42

Şartlı räweştä ğäyeple


5 mayda Ufanıñ Kirov rayonı mirovoy mäxqamäsendä oppozitsion başqort xäräkäte liderı Ayrat Dilmöxämätovnı keşelärne ekstremistik ğämällärgä çaqıruda ğäyepläw eşenä noqta quyıldı. Ayrat Dilmöxämätov bıltır, 26 martta Ufada ütkän mitingta çığış yasağanda xalıqnı Başqortstan prezidentı utırğan binağa bärep kerep Mortaza Räximovnı urınınnan kitärgä mäcbür itärgä çaqıruda ğäyeplänä ide. Ber yıldan artıqqa suzılğan mäxqamä eşe Dilmöxämätovnı ğäyeple dip tanu belän tämamlandı. Anı ber yılğa irkennän mäxrüm itü turında qarar çığarıldı. Ämma, Dilmöxämätovnıñ berençe tapqır mäxqamägä tarttırıluın, öç bala atası buluın häm ğämäleneñ bik awır bulmağanlığın isäpkä alıp, irkennän mäxrüm itelüe şartlı dip iğlan itelde. Ber ük waqıtta Dilmöxämätov zindançılar inspeksiäsenä barıp terkälergä mäcbür itelä, alarğa beldermiçä aña şähärdän çitkä kitü, eşen alıştıru tıyıla. Şulay itep ul öç yıl buyına xoquq saqlaw orğannarınıñ maxsus küzätüe astında yäşärgä tieş bula.

Ämma, Ayrat Dilmöxämätov üze dä, anıñ advokatı da mäxqamä qararı belän kileşmäwlären, ğädellek artınnan yuğarıraq mäxqamägä möräcäğät itäçäklären belderdelär. Ayrat Dilmöxämätov älege mäxqamä qararın üzeneñ awızın yabarğa mataşu dip isäpli. Mortaza rejimı mine alaşağa äyländerergä mataşa dide ul “Azatlıq” xäbärçesenä.

Kärim Yauış, Ufa

XS
SM
MD
LG