Accessibility links

якшәмбе, 4 декабрь 2016, Казан вакыты 05:06

Seber tatarlarınıñ tuy yolası küreneşe fol''klor bäygesendä berençe urınnı aldı


-Başqa kollektivlar kübräk aulaq öylärne, kiçke uyınnarnı kürsätälär. Tuy yolasın moña qädär kürsätkännäre yuq. Yaxşı itep öyränelmägän,-di Tömän rayonı Talımxan mädäniät yortı mödire Raif Sabirov.

-Min universitetta uqığanda da diplom eşen seber tatarlarınıñ tuy yolası buyınça yazğan idem. Seber tatarlarınıñ tuy yolasında ırımnar küp. Yeget belän qız utırğan at yeget öenä qaytıp citkäç, atnı ut aşa sikertep alıp kergännär. Cennär, pärilär, naçar köçlär iärep kermäsen dip. Xäzer andıy närsä yuq. Busağanı atlawğa utlı kümer belän äyländerep çıqqannar. Şulay uq cennär kermäsen dip. Qatı tastımal belän yeget belän qızğa suqqalağannar cennär kermäsen dip.

Xäzer köndä saqlanğan ırımnardan, ğädätlärdän: öydä qız atlıysı idängä material cäyelä, häm anıñ artınnan qıznıñ ciñgäläre ikegä yırta baralar. Aña yaqtı yul teläp. Bu yola xäzer dä saqlana.

Bez üzebezneñ küreneşkä seber tatarları cırların häm töyderep

biyüne aldıq.

Süz uñayınnan şunı dä äytep uzarğa kiräkter. Tömän däwlät sänğät häm mädäniät institutı uqıtuçısı Wälimä Taşkalova seber tatarlarınıñ tuyları turındağı fänni eşen tögälläp kilä. Cäy köne bu xezmäte belän kandidatlıq dissertatsiäsen yaqlayaçaq. Anıñ xezmäte kitap bulıp basıla qalğanda, cirle tuy yolasınıñ küp üzençälekläre açılaçaq.

Bügenge köndä seberdäge awıllardağı tuylar niçek uza soñ? Seber cırların cırlıylarmı? Bu xaqta bez Talımxan mädäniät yortı xezmätkäre Gölnur Xäkimova belän söyläştek. Gölnur Xäkimova Qazannan sebergä kilgäç kompozitor İslam Safin belän küp tuylarda bula, alıp bara.

-Ölkännär kübräk xalıq cırların “Sarman” häm başqalarnı cırlarğa yarata. Urta buın populyar cırlarnı başqara. Mullaş yaqları Zöfär Xäyretdinovnıñ “Abağa” cırın cırlıy. Här tuy sayın cırlana torğan cır- “Ayırılmağız”.

Talımxan awılı mädäniät yortı xezmätkärläre häm awıl yäşläre kürsätkän tuy yolası fol''klor bäygesendä qatnaştı.

-Bu bäygedä 12 kollektiv buldı. Tatarlar ğına tügel. Urıs, çuaş häm başqalar da bar ide. Bez yäş törkem, şulay buluğa qaramastan berençe urınnı aluıbızğa bik söyendek,- di Raif Sabirov.

Talımxannarnıñ uñışı turında xäbär tiz taraldı. Alarnı 4 nçe iyün könne uzaçaq “Salawat küpere”- ölkä külämendäge törle millätlärneñ sänğät bäygesenä dä çaqırdılar. 19 may könne bulaçaq “ Bulat Söläymanov uquları” fänni-ğamäli konferensiäsen yomğaqlaw konsertında da qatnaşaçaqlar.

Nail Alan, Tömän

XS
SM
MD
LG