Accessibility links

дүшәмбе, 5 декабрь 2016, Казан вакыты 03:26

Eks-Däwlät Duması deputatı irekkä çığaçaq


1976 yılda Sovet armiäsennän psixik yaqtan sälämät tügel digän diagnoz belän xärbi xezmättän azat itelgän elekke Däwlät Duması deputatı Sergey Şaşurin may axırında irekkä çığaçaq. Rusiäneñ Yuğarı mäxkämäse Şaşurinğa qarata bulğan yala-ğayıpläwlärne yuqqa çığardı. 2005 yılnıñ 2 fevralendä Qazan şähäreneñ Mäskäw rayonı mäxkämäse Däwlät Duması urındığında utırıp alğan deputatnı 1 yılda 8 ayğa iregennän mäxrüm itkän ide. Şaşurin 3 stat'ya buyınça yala yağuda, deputat qağılğısızlığı belän tieşle däräcädä qullanmawda ğayıplänä. Aña qädär ul 7 yılğa qaraqlıqta ğayıplänep iregennän mäxrüm itelä. Şunnan Tatarstannıñ Yuğarı mäxkämäse Şaşurinnıñ deputat bulıp alğanlığın istä totıp bulsa kiräk, 7 yıllıq cäzanı 4 yılğa qaldıra. Xäzer isä Rusiäneñ Yuğarı mäxkämäse Sergey Şaşurinğa qarata yala-ğayıpläwlärne kire qaqqaç aña 2 yılda 7 ay ğına timer çıbıq artında utırası qala. Şaşurinnıñ advokatı Mixail Voronin cäzanıñ waqıtı ğayıplänüçene qulğa alu könennän sanala di. Ğayıple eks-deputatnı Tatarstannıñ tärtip saqlawçıları 2004 yılnıñ 12 martında qulğa alğannar. Dimäk, timer çıbıqlı, durt stena artınnan advokatı äytüençä Şaşurin şuşı aynıñ azağında irekkä çığaçaq. Şaşurinnı küp tapqırlar cäzağa tartsalar da Rusiäneñ Yuğarı möftie Tälğät Tacetdin häm başqa bilgele keşelär anıñ yağında qalğannar. Ul tieşle urında eşlägändä, tieşle keşelärgä bulışıp qalğan. Şul uq möfti Tälğät Tacetdinnı alsaq ta, Şaşurin 15 mäçetne ayaqqa bastırırğa yärdäm itkän dilär. Anıñ advokatınıñ ğayıple eks-deputatnıñ Tatarstan tärtip saqlawçılarına qarata törle ğayıplär, yalalar atuın belä torıp, axır çiktä cäza waqıtın qısqartuı da moğcizağa oşağan bit. Russiäneñ Yuğarı mäxkämäseneñ qararınnan soñ Tatarstannıñ eçke eşlär ministrı Äsgät Säffärov: “Mäxkämäneñ qararın xörmät itäm. Şaşurin qısqa ğına waqıtta bulsa da tieşle cäzanı aldı, annan soñ bezneñ Şaşurinnan başqa da eşlärebez citärlek, ana bolay da artıq iğtibar birdek buğay” – dip cawap qaytarğan. Sergey Şaşurin Tatarstan citäkçelegenä oppozitsion köç bulıp tora. Ul dürt stena artında bulsa da, Şaşurinnıñ yärdämçeläre irektä anıñ ideyälären aqrın ğına tormışqa aşırırğa tırışalar. Respublikanıñ bäysez gazetalarında törmädä utıruçı Şaşurinğa yullanğan xatlar kürsätelgän. Konvertlarına Mindeleewsk şähäre, Şaşurinğa dip yazıp ta quyılğan. Dimäk, respublika xakimiätenä oppozitsiä buluçı eks-deputatnıñ törmädän çıqqanın kötep toruçılar citärlek. Röstäm İsxaqi

XS
SM
MD
LG