Accessibility links

шимбә, 10 декабрь 2016, Казан вакыты 21:37

“Jurnalistnı – irekkä, qaraqlarnı – törmägä!”


6 mayda Başqortstannıñ berläşkän oppozitsiäse Ufada urnaşqan Rusiä FSBsı häm Başqortstan Prokuraturası binası qarşında (alar ber binağa urnaşqan) “timer Feliks” häykäle yanındağı mäydanda süz iregen çikläwne tuqtatunı häm bäysez jurnalist Viktor Şmakovnı azat itüne taläp itep säğät yarımlıq piket ütkärdelär. Buylı-buylı törmä kieme kigän distädän artıq piketçılarnıñ qulındağı plakatlarda: “FSB urınnardağı klanğa tügel, däwlätkä xezmät itärgä tieş!”, “Başqortstanda süz iregen buunı tuqtatırğa!”, “Bäysez matbuğattan qulığıznı alığız!”, “Jurnalist Viktor Şmakovqa – azatlıq!”, Jurnalistnı – irekkä, qaraqlarnı – törmägä!” ,“Süz irege – däwlät iminlege!” h.b. şundıy eçtälekle süzlär yazılğan ide.

Älege çarağa FSB xezmätkärläre dä nıqlap häm, älbättä inde, üzlärenä xas ısullar qullanıp äzerlängän bulıp çıqtı. FSB binası urnaşqan kvartal tiräsendäge uramnardan maşinalar borıp cibärelde, piket ütüçe taş belän qaplanğan mäydanğa aldan yartı maşina qom sibep, şunı bertuqtawsız maxsus texnika yärdämendä tegeläy-bolay seberep tordılar, piketçılar aldınnan ütüçe yuldan köçle tawışlı qoramallar belän tip-tigez asfal'tnı qazıdılar. Ämma, fsbçılarnıñ “şuqlıqları” bolar belän genä çiklänmägän bulıp çıqtı. Piket tämamlanğannan soñ Başqortstannıñ berläşkän oppozitsiäse liderı Ramil Bignov aldan kilmeşengän urında – FSB binasınnan yıraq bulmağan ber kafeda jurnalistlar öçen matbuğat konferensiäse ütkärergä dip barğaç, kafe xucası urınnar buş bulsa da keşelärne işektän ütkärmäde. Çarasızdan jurnalistlar belän äñgämä açıq hawada, “Watan” kinoteatrı aldındağı mäydanda ütkärelde. Ä kafe bu waqıtta ğädäti rejimda eşli ide inde. Ramil Bignov fsbçılarnıñ monıñ işe köräş ısulların “marazm” dip bähaladı

Kärim Yauış, Ufa

XS
SM
MD
LG