Bu könnärdä Yekaterinburg şähäreneñ sport yortında näfis gimnastika buyınça bertuğan Näcmetdinovalar prizına açıq yarışlar uza. Şähärneñ Lenin rayonı xakimiäteneñ fizkul'tura häm sport bülege ğädättä yıl sayın oyıştıra torğan bu yarışlar bu yıl berençe tapqır Näcmetdinovalar kubogına uzdırıla. Bu yarışlarda qatnaşırğa dip Yekaterinburg, Qazan, Samar, Perm, Çiläbe, Kurgan, İjau, Mojga, Snejinsk häm başqa şähärlärdän iñ köçle gimnastlar cıyılğan. Qatnaşuçılar arasında biş-altı yäşlek sabıylar da, buy citkän güzällär dä bar.
Yarışlarnıñ açılu tantanasına näfis gimnastika buyınça xalıqara häm atqazanğan sport masterları, elekkege yıllarda bu tör sport buyınça çempion isemen yaulap alğan layıqlı keşelär, xakimiät wäkilläre, ata-analar häm kiñ cämäğätçelek cıyılğan ide. Bilgele inde, bäyrämneñ yözek qaşı bulıp bertuğan Näcmetdinovalar tordı.
Dürt qız tuğannıñ iñ ölkäne – Liliä näfis gimnastika digän sport törenä nigez salğan keşe disäk tä yalğış bulmas. Ul – näfis gimnastika buyınça iñ berençe sport masterı, iñ berençe xalıqara yarışlarda ciñü yaulağan, 15 tapqır SSSR çempionı isemenä layıq bulğan.. Rozaliä – Rossiäneñ atqazanğan trenerı, ike tapqır SSSR çempionı, bik küp kömeş häm bronza büläklärgä iä bulğan keşe. Atqazanğan sport masterı Älfiä – tasma belän künegülär buyınça dönya çempionı, küp kenä kömeş häm bronza prizlarğa layıq bulğan. İlmira şulay uq atqazanğan sport masterı, SSSR çempionatlarında bronza prizlarğa layıq bulğan keşe.
Näcmetdinovalar iseme iñ berençe tapqır uzğan ğasırnıñ illençe yılları başında telgä kerä başlağan ide. Arada iñ ölkäne, Liliä Näcmetdinovanıñ näfis gimnastika belän nıqlap şöğellänä başlağanına inde altmış yıllap waqıt ütkän. Şuña qaramastan, qızlar bügen dä safta. Alar yäşlärne maturlıq, güzällek ruxında tärbiäläwne däwam itälär.
Yekaterinburg şähäreneñ balalar häm yäşüsmerlär sport mäktäbeneñ berse bertuğan Näcmetdinovalar isemen yörtä. Bu yarışlarda anda tärbiälänüçelär dä qatnaşa. Alar öçen dulqınlanuın belderep, Liliä xanım Näcmetdinova, başqalar öçen bäyräm bulğan mondıy çaralarnıñ sabıylar öçen zur mäktäp ikänlegen assızıqladı.
Yarışlarnıñ açılu tantanasında qatnaşuçılarnı sälämläp çığış yasawçılar arasında Tatarstannıñ Uraldağı daimi wäkile Rawil Bikbov ta bar ide. Rawil äfände Tatarstan respublikasınıñ näfis gimnastika kebek sport tören dön'yaküläm bieklekkä kütärgän tatar qızları belän ğorurlanuın belderde häm qatnaşuçılarğa zur uñışlar teläde.
Tantanada qatnaşuçı Bötendönya tatar kongressı başqarma komitetı äğzası Mösäwir Xösäyenov kürenekle tatar qızlarına häryaqlap bulışıp torırğa äzer buluın belderde. Mösäwir äfände gubernator xakimiätenä Liliä Näcmetdinovağa Sverdlovski ölkäseneñ poçetlı grajdanı iseme birü turında sorap möräcäğät itüe turında söyläde. Şulay uq bügenge köndä matdi awırlıqlar kiçergän Näcmetdinovalar sport mäktäbenä häryaqlap yärdäm itü yulların ezlibez, dide ul.
Bertuğan Näcmetdinovalar kubogına oyıştırılğan yarışlar legendar sportçılarnıñ kürsätmä çığışı belän başlanıp kitte. Şaqtıy ölkän yäştä bulularına qaramastan, apalı-señelle Näcmetdinovalar dürtese dä iskitkeç güzäl, sığılmalı xäräkätläre belän soqlandırdılar. Alarnıñ çığışın zalğa cıyıluçılar köçle alqışlar belän qarşı aldı.
Fäwiä Safiullina,Yekaterinburg
