Accessibility links

сишәмбе, 6 декабрь 2016, Казан вакыты 06:00

“Umırzaya” Qazanğa alıp barğan tamaşasın Omskida kürsätte


Omskida Böyek Watan suğışında ciñüneñ 61 yıllığı bıyıl da küp törle çaralar belän bilgelänä. Mäktäplärdä, yuğarı häm başqa uqu yortlarında suğış veterannarı belän oçraşular ütä, memorial' komplekslar, suğış batırları häykälläre yannarında mitinglar ütkärelä, çäçäk quyular oyıştırıla. Bu könnärdä barğan sport yarışları, avtouzışlar, törle köç sınaşular – barsı da ciñü könenä bağışlana. Ölkäneñ awıl – rayonnarında, şähärlärendä veterannar öçen kiçälär oyıştırıla, maxsus äzerlängän konsert programmaları kürsätelä. Omskinıñ “Umırzaya” tatar-başqort xalıq ansamble dä şimbä könne quyğan konsertın ciñü bäyrämenä bağışladı. Anda suğış häm tıl veterannarı qäderle qunaq itep çaqırılğan ide. Konsert başlanır aldınnan säxnägä Seber yağı möftiäte Zölkärnäy xäzrät Şakircanov kütärelde. Ul veterannarnı häm zalda utıruçılarnı ciñü bäyräme belän täbrikläde, suğışta wafat buluçılar ruxına doğa qıldı.

Ölkä tatar milli mädäni möxtariäte räise Xäkim Sadıykov ta xalıqnı ciñü bäyräme belän täbrikläde. Bäyräm uñayınnan ul “Umırzaya” ansamble citäkçesenä, xoreografına häm bayançılarına möxtariätneñ ölkä zakon çığaru cıyılışı deputatı Rawil Bikbavov tarafınnan imzalanğan räxmät xatların tapşırdı.

Kiçäne alıp baruçılar zalda utırğan veterannarnıñ isemnären äytep çıqtılar. “Şunsı qızğanıç, yıl sayın isemlek qısqara. Ölkän yäştäge veterannarıbıznıñ qayberläreneñ dönyadan kitüe, ikençeläreneñ sälämätlekläre qaqşaw bulu säbäple bäyräm çaralarında kürä almıybız. Tağın ozaq yıllar bezne söyenderep yäşägez äle, xörmätle veterannar! ” - didelär alar. Annan soñ tamaşaçılarğa “Umırzaya” ansambleneñ Bötendönya tatar kongressı Başqarma komitetı çaqıruı buyınça Qazanğa barıp, uñışlı çığış yasap qaytuı turında belderelde. Kongressnıñ ansambl' qarşında eşläwçe “Ömet” törkeme balalarına yaña säxnä kiemnäre büläk itüe turında xäbär itelde. Bu xäbärlärne tamaşaçılar köçle alqışlar belän qarşıladılar, Tatarstan citäkçelegenä, Bötendönya tatar kongressınıñ Başqarma komitetına “Umırzaya” kollektivına şundıy zur iğtibar kürsätkäne öçen räxmätle buluların belderdelär.

Kiçäneñ konsert öleşenä kilgändä, Omski tamaşaçılarına kollektiv Qazanğa alıp barğan programmasın kürsätte. Elek xäbär itkänebezçä, bu programma asılda Seber yaqlarında populyar bulğan cırlardan tözelgän ide. Qazanlılar kebek, omskilılır da kollektivnıñ bu yaña programmasın cılı qarşıladılar, här çığışnı qaynar alqışlarğa kümdelär. Konsert tämamlanğannan soñ kiçä foyeda cır-iyüllär belän däwam itte.

“Umırzaya” kollektivınıñ Ciñü bäyräme uñayınnan şähärdä oyıştırılğan qayber başqa çaralarda çığış yasawı turında da äytergä kiräk. Ölkä zakon çığaru cıyılışı qarşısındağı mäydanda, ölkä filarmoniäseneñ zur konsertlar zalında, muzıkal' teatrda ütkärelgän konsertlarda kollektivnıñ biüçeläre häm cırçıları qatnaştı. Bäyräm uñayınnan milli oyışmalar belän eşläwçe “Duslıq yortı” da konsert-kiçä oyıştırdı. Döres, çarağa törle millät veterannarı çaqırılğan bulsalar da, çığış yasarğa milli kollektivlar cälep itelmägän idelär. Konsert programması asılda rus kollektivları çığışlarınnan tordı.

Saniä Mirxaleewa, Omski

XS
SM
MD
LG