Ramil Turaev: Aşığıç yärdäm härkemgä yärdäm itärgä äzer

Tatarstanda yallar däwam itä, kem awılda, baqçada, kem şähär uramnarında härkem üzençä bäyräm itä. Bäyrämnär ğädättä qızıqlı çaralar, küñel açu belän istä qalsa da, qaysı waqıtnı bu könnär borçılu,awırular da alıp kilä. Menä şundıy küñelsez xäl bu könnärdä Qazanğa Törkiädän kilgän ber millättäşebez belän dä buldı – ul awırıp kitte. Bäyräm könnärendä awırıp kitkän Törkiädän kilgän Färit isemle millättäşebez ni eşlärgä dä belmiçä bezgä şaltırattı. Anıñ temperaturası kütärelgän, xäle yuq ikän. Bäyräm, yal könnäre bulu säbäple, xastaxanälär eşlämi, tanış tabiplar da yuq. Bez şiklänä-şiklänä genä, aşığıç yärdäm xezmätenä şaltırattıq. Ni disäñ dä, Färit äfände çit il keşese bit, Rusiä watandaşı tügel. Andıylarğa yärdäm kürsäteläme, monıñ öçen alarğa aqça tülärgä kiräkmime? Läkin 03 telefonına şaltıratqaç, andağı operator xanım bezne tınıçlandırdı häm şunda uq awırıp kitkän millättäşebez yanına tabiplarnı cibärergä wäğdä itte, awırunıñ yäşägän urının soraştı. Ozaq ta ütmäde, Färit äfände yanına belgeçlär kilep, aña yärdäm dä kürsätep kitte.

Ä bu oçraq bezne Aşığıç yärdäm xezmäteneñ eşçänlege turında uylarğa etärde. Alar bäyrämnärdä niçek eşli, bu könnärdä xalıqqa yärdäm itü niçek oyıştırılğan? Şuşı sorawlarğa cawap alu öçen bez Qazan şähäreneñ aşığıç yärdäm kürsätü stansiäseneñ baş tabibı Ramil Turaevqa möräcäğät ittek. Yal köne buluğa da qaramastan, ul üz eşen taşlamıy, yärdäm kürsätüneñ niçek baruın haman tikşerep tora.

Aşığıç yärdäm xezmäteneñ yalları yuq inde anıñ. Yılda 365 kön bulsa, 365 kön täwlegenä 24 säğät eşlibez bez. Bäyrämnärdä törle çaralar ütä torğan cirgä berniçä tabiptan torğan törkemnär cibäräbez. Bezneñ yärdämgä böten keşe ömet itä ala. Rusiä watandağı bulsa da, bulmasa da, ul qaydan ğına kilgän bulsa da bez kiräk oçraqta härkemgä tüläwsez aşığıç yärdäm kürsätäbez

Menä şulay itep, yallarda da, bäyrämnärdä dä aşığıç yärdäm tabipları kizüdä tora. Militsiä, ğädättäntış xällär xezmätkärläre kebek ük alarnıñ eşläre ällä ni kürenmäsä dä, başqa xalıq yal itep, küñel açqanda alar bezgä yärdämgä kilergä äzer tora.

Gölnaz İlgizär