Accessibility links

сишәмбе, 6 декабрь 2016, Казан вакыты 08:58

Qazan xärbiläre irektän mäxrüm itelde


Böten Rusiädäge şikelle Tatarstan xärbi uqu yortlarında da dedovşçina çäçäk ata. Äle ike ay elek kenä xärbi mäxkämä Qazan garnizonınıñ keçe serjantı Pavel Çipul'skiynı yäş xärbilärne mısqıllağanı öçen ike ayğa irektän mäxrüm itkän ide. Xäzer isä tağın ike xärbi näq şundıy uq cinayät öçen cawaplılıqqa tartıldı.

Mäxkämägä qädär İlgiz Gäläütdinov häm Yevgeniy Lipovskiy ikese ike yaqta: İlgiz – räşätkä artında, Yevgeniy isä alar tarafınnan zıyan kürgän dürt yäş xärbi – Zuev, Orlov, Terent'yev häm Qorbanovlar yanında bulğan. Bu waqıtta Lipovskiy häm Gäläütdinov üz-ara ber dä elemtägä kermägän. Äyterseñ, alar ber-bersen belmi dä. Ä bit berniçä ay elek kenä Qazan xärbi yuğarı uqu yortı keçe serjantları Yevgeniy belän İlgiz xezmät itärgä 100 kön qaluın bergä bilgeläp ütärgä cıyınğan. Älege bäyrämneñ çığımnarın yäşräk xärbilär kütärer dip isäplägän alar. Häm här bersennän 300 sum taläp itkän. Tik yäşräk xärbilär qıyu bulıp çıqqan. Alar yodrıqlar belän aqça birmäyäçäklären añlatqan. Ämma inde ike aylap waqıt uzğaç, yäş xärbilärgä barıber taläp itelgän aqçanı cıyarğa turı kilgän. Häm alar şuşı xaqta uqu yortı citäkçelärenä dä xäbär itkän. Ul waqıtta inde yäş xärbilärneñ eş mäxkämägä qädär citkereläçäk dip başına da kilmägän. Uqu yortı citäkçelege mısqıllawçı xärbilärne urınğa utırtır, çüpne ızbadan çığarmas dip ışanğan alar. Ämma mäxkämä eşe açılğan. Zıyan kürgän xärbilär Lipovskiy belän Gäläütdinovnı kiçerep tä qarıy, ämma çıqmadı. Şulay da xökem qararın çığarğanda, monı isäpkä alıp, ğäyeplänüçelärgä 5 yıl urınına 2 genä yıl birelgän.

Ämma İlgiz ta, Yevgeniy da üzlären ğäyeple dip sanamıy. Xökem qararı äytelgändä, İlgiz Gäläütdinov küz yäşlären yäşermiçä yılağan. Yevgeniy Lipovskiy isä qararnı tınıç qına qabul itkän. İlgizneñ änise mäxkämädä bulğan xällär turında äle belmi. Xärbineñ ätise monı ser itep saqlıy. Ul İlgizneñ ğäyepsez buluına tulısınça ışana. Häm mäxkämäneñ mondıy qarar çığaruın uqu yortında dedovşçina yäğni ağayçılıq belän nıq qına köräşüen kürsätergä teläwläre belän añlata.

Şulay da xakim üz süzen äytte. Yäş xärbilärne mısqıllağan öçen İlgiz Gäläütdinov belän Yevgeniy Lipovskiy ike yılğa ğomum rejimlı koloniädä irektän mäxrüm itelä.

Al'bina Zäynulla

XS
SM
MD
LG