Accessibility links

якшәмбе, 4 декабрь 2016, Казан вакыты 11:21

Qazanda Ciñü könenä bağışlanğan çaralar ütte


Suğış wäxşäten toyğan häm bügen dä bezneñ arada bulğan yäki bulmağan zamandaşlarıbıznıñ bäyrämendä alarğa qarata ixtiram arttıru, izgelek qılu, ülgännärneñ xäteren yañartu köne buldı Qazanda 9 nçı may könne. Citäkçelär häm cämäğätçelek wäkilläre respublika ziratlarında häläk bulğannar häykälenä çäçäklär saldılar. İñ zur bäyräm çaraları Yaña Savin rayonındağı Ciñü parkında buldı. İrtänge säğät unda respublika prezidentı qatnaşlığında mäñgelek ut yanına çäçäk saludan başlanıp kitte ul çara. Veterannarğa xörmät süzläre, suğış betep, imin tormış urnaştıru mizgeleneñ ähämiäte turında fikerläre belän şähär başlığı İlsur Metşin çığış yasadı. Annarı ul süzne Tatarstan Prezidentı Mintimer Şäymievqa birde. Mintimer Şäymiev isä üz çiratında, bäyräm notığı belän veterannarğa häm bäyrämgä kilüçelärgä möräcäğät itte: “Bügen bez sezneñ belän İkençe bötendönya suğışında Ciñüneñ 61 yıllığın bilgeläp ütäbez. Bu – bezneñ Dan köne, Xäter köne, Xäsrät köne, xäzerge buınnıñ Burıç häm Ant köne. Bez mondıy xällärgä bütän berqayçan da yul quymasqa, buınnan-buınğa izge suğış, frontta häm tılda häläk bulğannar xaqında xatirälärne tapşırırğa tieş. Bu – Berdämlek köne! Ciñü köne ixtıyar köçen, rux nıqlığın, xalıq berdämlegen, watannı saqlaw öçen köräşkä kütärelü häm anı yaqlap qalu säläten çağıldıra. Ciñüçe xalıqqa dan!”, - dip yomğaqladı üzeneñ süzen respublika başlığı. Annan soñ, bäyräm mitingı qısalarında säxnäläşterelgän tamaşa kürsätelde. Tanılğan artistlar başqaruında suğış, Ciñü şatlığı turında cırlar yañğıradı. Mäydannarda balalar cır häm biü kollektivları çığış yasadı. Axırdan, mäydanğa Suvorov isemendäge, tank, artilerriä mäktäpläre kursantları, eçke eşlär ministrlığı xezmätkärläre häm başqa xärbilär qatnaşlığında tantanalı marş belän ütte. Parad iske maşinalar ütüe belän tämamlandı. Tatarstanda ikençe dönya suğışına 700 meñ keşe kitkän. Şularnıñ yartısı, 350 meñe, yaw qırında häläk bulğan. Teläsä nindi suğış öçen bu bik awır san. Tatarstanlılar häm tatarlar iñ awır xärbi büleklärdä häm iñ qatı suğışlar barğan urınnarda saper , şımçı, höcüm itüçe häm başqa xätär wazifalar başqarğannar. Baltaç rayonınıñ Çepya awılınnan suğışqa kitüçelärneñ 85 protsentı yañadan äylänep qaytmağan. Brest kreposten saqlawçılar komandirı, keräşen tatarı, Piträç awılınnan kitkän Petr Gavrilov, şulay uq Ğazinur Ğafiätullin, Ğaziz Zahitov, Mixail Devyataev kebeklärneñ isemnäre böten dönyağa bilgele. Xäzer arabızda yäşäwçe veterannar torğan sayın kimi bara.

Qazanda bäyräm çaraları kiçke säğät unda bäyräm salyutı belän tämamlanaçaq. Ul 61 märtäbä atılır dip kötelä. 10-15 minut däwam itäçäk salyut utların xalıq Qazannıñ barlıq rayonnarında kürä alaçaq

Gölnaz Şäyxetdin

XS
SM
MD
LG