Bıyıl yubiley yılı bulmasa da, suğış veterannarı öçen bäyräm çaraları zurlap uzdırıldı. 6 mayda Mäskäw artistları konsert kürsätte. Konsert veterannar öçen tüläwsez buldı.
8 mayda irtän milli-mädäni möxtäriät häm Peterburg cämiğ mäçete isemennän Piskarevka memorial' ziratındağı tuğannar qäberlegenä çäçäklär salındı. Köndez Peterburg häm Leningrad ölkäse tatarlarınıñ töbäk cämğiäte häm Peterburg eşquarları veterannar öçen xäyriä kiçäse uzdırdı. “Redison Sas” qunaqxanäse restoranında.
Kiçädä qotlawlar küp buldı, Tatarstan prezidentı Mintimer Şäymievnıñ qotlawı da uqıp ireşterelde. Telmärlär Peterburg konservatoriäse studentlarınıñ çığışları belän aralaşıp bardı. Veterannar da üz xatiräläre belän büleşte. Böyek Watan suğışı waqıtında medsanbat komandirı bulğan Rawil abıy İmangolov söyli: “Suğış yıllarında mediklar qulınnan 20 million yaralı ütkän häm şularnıñ 17 millionı yañadan safqa qaytqan. Bez iñ qanlı suğış - II Bötendönya suğışında ciñsäk tä, III - mäğlümati-psixologik suğışta ciñeldek. Şunısı bik ükeneçle.”
Monısı inde mäktäp eskämiäsennän yunğalar mäktäbenä elägep, “Tön'yaq konvoenda” qatnaşqan Mir abıy Niğmätullin : “Yunğalar mäktäbendä tanılğan rus yazuçısı Valentin Pikul', cırçı Boris Ştokolov belän tanıştıq. “Tön'yaq konvoenda” minnän başqa da tatar yegetläre bar ide”.
Kiçäne äzerläwgä häm ütkärügä Tatarstan häm Başqortstan wäkillekläre dä küp köç quydı. Başqortstan wäkillegeneñ iñ äwzem xezmätkärlärennän berse Sania xanım Guşçinanı tıñlap qarıyq : “Ciñü neñ 60 yıllığı aldınnan xärbi komissariatta suğış veterannarı isemlegennän millättäşlärebezne ezläp taptıq, kiçägä çaqırdıq, yıl buyı alar belän aralaşıp yäşädek. Äle dä bäyrämgä çaqırdıq. Aralarında 92 yäşlek ber babay da bar ide. Bik qänäğät bulıp kittelär”)
“Tatar generalları” cırın başqarıp ta, kiçä barışında kompozitorlar äsärlären häm xalqıbız cırların tıñlatıp ta veterannarnıñ üz keşesenä äylängän Mäskäw qunağı Nailä Fatixova da berniçä süz äytte: “Min bik şat şundıy izge keşelär belän tanışuıma, min ğorurlanam, alarğa sälämätlek telim”
Ä xäzer süzne kiçä proyektınıñ avtorı häm alıp baruçısı Älfiä Räxmätullinağa birik inde: “Bu proyektnı tormışqa aşıruda bik küplär yärdäm itte. Yawa qar, yawa qar, kemder yuq, kemder bar di xalıq. Ber yıl eçendä bez öç veteranıbıznı yuğalttıq. İsännärneñ qäderen belep qalırğa kiräk”.
Äye, xaq süzlär: kemder yuq, kemder bar. Kiçädä inde yuqlar isemlegenä küçkän Sayra apa Vel'şakova da iskä alınıp ütte, anıñ “Yalğız ağaçı” da yañğıradı. Häm tıñlawçılar konservatoriä studentkası, rus qızı Svetlana başqaruındağı “Ciläk cıyğanda” cırın da Sayra apabız istälege itep qabul itte.
Yıldan yıl veterannarnıñ räte sirägäyä häm alar kergän foto-videomateriallar tarixqa küçä bara. Ämma läkin tatar cämğiäteneñ ictimaği-mädäni tormışında qaynağan, härber veterannı yaqınnan belgän tatar operatorları häm fotograflarına kiçäne töşerergä röxsät birelmäde. Xätta 20 yıllap Peterburg tatarları yılyazmasın alıp barğan fotograf Mönirä Moratovağa da. Suğış veterannarı kiçäsen çirattağı “xalturağa” kilgän çit millät wäkilläre töşerde.
Gölzadä Kamalova, Sankt-Peterburg
