Accessibility links

җомга, 2 декабрь 2016, Казан вакыты 23:04

Abxaziä Görcistanğa yaña tınıçlıq planın täqdim itte


Uzğan atnada Abxaziä prezidentı Sergei Bagapş parlamentqa, Abxaziä belän Görcistan arasındağı nizaqnı çişer öçen üzeneñ yaña planın täqdim itte. Anda - kiläçäktä ike bäysez däwlät – Abxaziä belän Görcistan arasında xezmättäşlek turında süz bara. Plannıñ iseme - "Kiläçäkkä açqıç". Häm ul açqıç – Görcistannıñ Abxaziäne bäysez däwlät bularaq tanuı bulaçaq.

Bagapş, Abxaziä berençe çiratta räsmi töstä bäysez däwlät itep tanılırğa tieş, dip sanıy. 6 may könne internettağı regnum.ru säxifäse Abxaziä prezidentınıñ nizaqnı çişü täqdimnären iğlan itte. Menä alarnıñ qayberläre:

-räsmi Tbilisi kimsetügä nigezlängän üzeneñ däwlät säyäsäte, suğış häm izolyasiä öçen Abxaziä aldında ğafu üterenergä tieş -Abxaziägä säyäsi häm iqtisadi basımnı tuqtatırğa tieş -Tbilisi hawada, cirdä häm Qara diñgezdä iminlek wäğdä itep kileşü imzalarğa tieş -oyışqan cinäyätçelekkä qarşı köräştä xezmättäşlek turında kileşü -Abxaziäne töbäktäge xezmättäşlek oyışmalarına qatnaştıru

Sergei Bagapş Görcistan prezidentı Mixeil Saakaşvili belän söyläşülärgä äzer buluın belderde.

Şuşı uq täqdimnärne Abxaziä prezidentı ğinwar ayında BMO İminlek Şurasına cibärgän ide. Mart ayında Bagapş bu planı xaqında Daniä radiosına birgän äñgämäsendä dä söylägän ide.

Ğömümän alğanda deputatlarğa Bagapşnıñ planı oşadı. Barı tik – qaçaqlarnı qaytaru belän bäyle iminlek mäsäläse turında sorawlar häm täqdimnär yañğradı.

Ni öçen "Kiläçäkkä açqıç" planın Bagapş näq uzğan atnada bäyän itte?

Qayberäwlär monı – Saakaşvilinıñ Abxaziä belän şulay uq räsmi tanılmağan Könyaq Ossetiä belän bulğan nizaqlarnı çişü planına soñlağan cawap dip bäyäläde.

Yäki "Kiläçäkkä açqıç" plan ölgese – fivral ayında Genevağa barıp qaytqan tuğanmı? "BMO general sekretare dusları" dip isemlängän törkem nizaqnı çişü yulların tabır öçen Genevağa Görcistan häm Abxaziä wäkillären çaqırğan ide.

Şulay uq belgeçlär fikerençä, uzğan ayda Kosovonıñ bäysezelege turında Venada barğan söyläşülär dä Abxaziägä yaña täqdimnär belän çığarğa ilham birgän bulsa kiräk.

Ğinwar ayı axırında Rusiä prezidentı Vladimir Putin, Kosovo söyläşüläre – milli-territorial nizaqlarnı çişü öçen ürnäk bula ala dip söylägän ide. Ul çaqta ul Abxaziä belän Könyaq Ossetiäne dä iskä aldı.

Görcistanğa bu çağıştıru ber dä oşamadı. Abxaziä citäkçeläre dä Putinnıñ süzlären xuplarğa aşıqmadı. Abxaz tışqı eşlär ministrı Sergei Şamba, Abxaziäneñ bäysezlekkä däğwaları Kosovonıqınnan küpkä citdiräk dip kenä belderde.

Bügengä qädär qädär Bagapşnıñ nizaqnı xäl qılu täqdimnärenä ni Tbilisi, ni xalıqara cämäğätçelektän reaksiä yuq. Bulsa da – anıñ tiskäre bulaçağına şik yuq diärlek. BMO, Yevropada İminlek häm Xezmättäşlek Oyışması häm NATO, barısıda Görcistannıñ territorial bötenlege yaqlı buluların inde beldergän ide. Bu qaraşnı äle küptän tügen Suxumda bulıp kitkän NATO Parlament Mäclese prezidentı Pierre Lellouche ta qabatladı. Uzğan atnada ğına Könyaq Ossetiä häm Abxaziägä bulğan säfäre barışında, Lellouche, ike törle millät tınıç yäşägän Kanada häm İspaniä illären misal itep kiterde. Anıñ üz eçenä Abxaziäne alğan Görcistan federasiäse tözü turındağı täqdimen Bagapş kisken kire qaqtı, Abxaziä barı tik "bäysez demokratik däwlät" bulaçaq, dide prezident.

alsu qormaş
XS
SM
MD
LG