Tatar gimnaziäse binasın cimerü däwam itä

İnde xäbär itelüençä, Başqortstan xakimiätläre quşuı buyınça, Ufada tatar gimnaziäse öçen dip tözelüçe binanı atnakiç könne cimerä başlağannar ide. Bu eş comğa könne dä däwam itte. İrtänge sigezgä ük Başqortstannıñ Berläşkän oppozitsiäse häm Başqortstan Tatar milli-mädäni moxtariäte yanında urnaşqan tözelep yatuçı bina yanına berniçä traktor, kütärüçe kran häm maşinalar kilde. Alarnı ozata kilgän qüät oyışmaları köçläre dä baytaq ide. Distädän artıq sud pristavı häm şulqädär ük militsiä xezmätkäre biregä kilgän texnikanı totqarlıqsız ütkärü xästärenä kereşte. Tatar milli oyışmaları wäkilläre ütkän köndä bu ğämällärgä qarşılıq kürsätergä tırışqan bulsa, bu yulı inde älege eşneñ faydasız ikänlegen añlap bulsa kiräk, qarşılıq qorıp bulaşmadı. Şulay itep, kilgän eşçelär törkeme häm texnika, sud pristavları küzätüe astında, tatar gimnaziäse binasın cimerüne däwam itte.

Älege xaqta Başqortstan Tatar milli-mädäni moxtariäte räise urınbasarı, professor Mäcit Xucin menä nilär söyläde.

Xucin – Bügen irtän ük binanı cimerüne däwam ittelär, äle dä cimerälär. Bez inde moña qarşılıq kürsätäçäkbez. 15-17 may könnärendä Ufa şähäre xakimiäte binası qarşında 100 är keşe cıyıp piketlar oyıştırırğa kileştek.

Başqortstan Tatar milli-mädäni moxtariäte räise urınbasarı, professor Mäcit Xucin buldı bu. Mäcit äfände Ufada cimertelä başlağan tatar gimnaziäse tiräsendäge tartqalaşnı xäl itü buyınça oyıştırılğan ştabnıñ başlığı da. Anıñ süzlärençä, Başqortstan xakimiätläre respublika tatarlarına qarşı çirattağı tupas höcümne yasadı. “Tatar gimnaziäse öçen tözelüçe binanı cimerep kenä, Başqortstandağı tatar xalqınıñ üz ruxın saqlaw telägen cimerep bulmıy, - di Mäcit Xucin. – Ğädellek öçen köräş çaraları däwam iteläçäk. Kiläse atna başında öç kön rättän Ufa şähäre xakimiäte binası qarşında piketlar oyıştıru şul çaralar isäbennän”.

Annan soñ Başqortstan tatarları problemalarına, il citäkçelegeneñ häm bötendönya tatar oyışmalarınıñ iğtibarın tağın da ber tapqır cälep itü öçen, kiläse atnalarda Qazanğa häm Mäskäwgä tatar milli xäräkäte citäkçelärennän torğan wäkilleklär baraçağın da äytte Mäcit Xucin.