Accessibility links

Qazannıñ “Ällüki” ädäbi berläşmäse Ufada


Qazan däwlät universitetınıñ “Ällüki” ädäbi berläşmäse äğzalarınıñ Başqortstanğa säfäre däwam itä. Biş keşedän torğan bu wäkillek Ufağa çärşämbe kiçen kilgän ide. Alarnı qunaqqa Başqortstan däwlät universitetında eşläp kilüçe “Aqçarlaqlar” tatar ädäbi tügäräge häm “Şoñqar” başqort ädäbi tügäräge äğzaları çaqırğan.

Qazan däwlät universitetınıñ “Ällüki” berläşmäse citäkçese, talantlı yäş şağir Lenar Şäyex citäkçelegendäge wäkillek öçen bay mädäni programma äzerlängän. Atnakiç könne Qazan qunaqları Başqortstan däwlät universitetında bulıp anda üzlären çaqırğan “Aqçarlaqlar” häm “Şoñqar” ädäbi tügäräklärenä yörüçe icatçılar häm filologiä fakul''tetı talipları belän oçraştı. Yäş qäläm ähelläre anda üzläre belän tanıştırdı häm yaña äsärlären uqıp işetterde. Annan soñ “Ällüki” ädäbi berläşmäse äğzaları Ufada Mäcit Ğafuri yort-muzeenda häm başqa istälekle urınnarda buldı.

Comğa könne dä istä qalırlıq oçraşularda buldı Qazan qunaqları. Respublikada tatar telendä çığuçı “Tulpar”, başqortça näşer itelüçe “Şoñqar” yäşlär jurnalları redaksiälärenä barıp, alarnıñ eşçänlege belän tanıştı häm üzläre xaqında da mäğlümatlar birde alar. Şulay uq Ufadağı möselman ziratına baru häm andağı kürenekle tatar häm başqort şäxesläre qäberlärenä çäçäklär salu da dulqınlandırğıç buldı qunaqlar öçen.

“Ällüki” ädäbi berläşmäse citäkçese Lenar Şäyex, ğomumän, bu säfärneñ bik qızıqlı ütüe xaqında äytep, kiläçäktä dä ike tuğandaş respublikanıñ yäş icatçıları arasındağı bäyläneşlärne nığıtu kiräklegen belderde.

Lenar – Bez Ufağa bik şatlanıp kildek. Tanışabız biredä icattaşlar belän. Elekke traditsiälärne yañartırğa kiräk. Elek ike kürşe respublika ädipläre tığız aralaşıp yäşägän. Yuez bu yolanı yañartırğa tieş. Yıl sayın bulsın ide mondıy oçraşular.

Qazan däwlät universitetınıñ “Ällüki” ädäbi berläşmäse citäkçese Lenar Şäyex buldı bu. Älege berläşmäneñ biş äğzası bu könnärdä Başqortstanda qunaqta. Şimbä könne dä Qazan qunaqlarınıñ Başqortstan

säfäre däwam itäçäk. Alar Stärletamak şähärendäge pedagogiä akademiäse talipları belän oçraşularda da qatnaşaçaq häm yäkşämbe könne Qazanğa qaytıp kitäçäk.

Fänis Fätxi, Ufa

XS
SM
MD
LG