Accessibility links

якшәмбе, 4 декабрь 2016, Казан вакыты 21:42

“Tatar radiosı” kubogına tup oçırdılar


Qazannıñ “Dinamo” stadionında voleybol uynawnı yış kürergä bula. Bu yulı ğadi genä tup oçıru tügel ide, çönki az-maz çittän qarap toruçı tamaşaçılar da cıyılğan, aralarında xalıq küñelen yaulağan keşelär dä kürende. Uyınnı oyıştıruçı “Bars Media” şirkäte häm anıñ qulındağı “Tatar radiosı” tamaşaçılarına yaña çara täqdim itte. Konsert-diskätüklär häm başqa şaw-şulı çaralar ütkärüçe “Bars Media” şirkäte bu yulı üzläre äytüençe berençe tapqır “Tatar radiosı” kubogına voleybol turnirı ütkärdelär. “Tatar radiosı”redaksiäseneñ başlığı Almaz Mirgayazov söyli:

- Mondıy ruxtağı çaralar uzdıru, ul üz-üzeñne reklamalaw. Voleybol turnirın oyıştıru “Tatar radiosı”nıñ tamaşaçılar belän bergä buluın häm sportnı yaratuın, propagandalawın kürsätä.

Uyında qatnaşuçı komandalar da ğadi genä uyınçılar tügel, ä cırçılar komandası. Alar arasında tanılğan cırçı-kompozitorlar Firzär Mortazin, Zöfär Xäyretdinov, Räsim Nizamov, Färit Taişev, “Zaman” törkemennän Ayrat Gomärov häm ber xatın-qız cırçı Liliä Mullağaliewa, ul axırdan estafetanı tormış iptäşenä tapşırdı. İkençe komanda da jurnalistlar, aralarında baş möxärrirlär: “Watanım Tatarstan” gäciteneke Miñnazıym Säfärov, “Käyef niçek?” neke Danil Säfärov, “Respublika Tatarstan” gazetasınıñ äydamanı Aleksandr Latıyşev häm başqa berniçä redaksiäneñ qäläm iäläre tup oçırtıp uynadılar. Turnirda barlığı 4 komanda qatnaştı, qalğan 2 komandanıñ bersendä “Tatar radiosı” di-djeyları fälännäre häm canatarlar komandası.

Cırçılar, di-djeylar, jurnalistlar, canatarlar oyıştıruçılar kubok biräbez digäç tupnı idängä töşermädelär diärlek. 2 säğät yarım däwam itkän uyında “Tatar radiosı” kubogın täqdim itüçe şul uq radio xezmätkärläre axırdan berençe urınğa qaldılar. Ä berençelekne canatarlar belän soñğı köräştä otıp jurnalistlar komandası “Tatar radiosı”nıñ berençe kubogın aldılar. Öçençe basqıçta cırçılar buldı. Uyın barışında bez “Käyef niçek?” gazetası baş möxärrire Danil Säfärov yal itkän arada, Danilğa; “Sez uyınnan häm komandalardağı uynawçılarnıñ uyınınnan qänäğätme?” – digän soraw birgän idek, häm ul menä närsä dide:

- Härxäldä äybät uynarğa tırışabız. Uyında ber moment bar, komandadağı 6 keşeneñ berse naçar uynasa, komanda uyını watıla-cimerelä. Läkin bu beznekelärgä yanamıy, min ışanam, bez canatarlarnı “bärep yoğaçaqbız”!

Danil Säfärovnıñ süzläre çınğa aştı. Tağın ike-öç aydan “Tatar radiosı” al'ternativ sport töre buyınça çirattağı turnir oyıştırırğa cıyına. “Sportnıñ nindi töre bulasın äytmibez, älegä ser”- dilär sport yaratuçı tatar şou-biznesı akulaları.

Röstäm İsxaqi

XS
SM
MD
LG