Accessibility links

сишәмбе, 6 декабрь 2016, Казан вакыты 06:04

"Xatın-qızlarnıñ sälämätlege sere açıqlandı"


Xatın-qızlarnı añlamassıñ. Bödrä çäçle qızlar çäçtaraşta säğätlär buyı çäçlären turaytıp utırğanda, andıy baylıqqa iä bulmağannarınıñ çäçlären ködrälätep cannarı çığa. Ğailäsen tuydırır öçen 3 eştä eşläp tağın öyne dä qarawçı xatınnar – ex, menä aqça citärlek bulsa qıl da selketmäs idem dip xıyallana. Aqçağa intekmägännäre – buşqa bulsa da berär cirdä eşlärgä äzer.

Bu atnada ğalimnär iğlan itkän ber tikşerü näticälären işetkäç, sez, xörmätle tıñlawçılar yılmayıp quyarsız. Britaniä belgeçläre - öydä uñğan xatın, yaxşı äni bulğan häm ber ük waqıtta karyera artınnan quırğa waqıtı citkän xatın-qızlar – dönyada iñ sälämät xatın-qızlar digän näticägä kilgän.

Tikşerüdä 1946 yılda tuğan, yağni bıyıl 60 yäşen tutırğan xatın-qızlar qatnaşqan. Sälämät buluı öçen – yanıñda tayana alırlıq ir-keşe, balalar häm eş buluı kiräk. Öydä utıruçı, üzläre genä bala üsterüçe häm balasız xatın-qızlar awıruğa tizräk sabışa häm urta yäşlärdä tazara ikän. Eşlämi öydä utırğan xatın-qızlarnıñ tazaruı – eşlägännärgä qarağanda 38%qa artıq ikän.

Elekke çorlardağı "eşlämägän – aşamıy " digän mäqäl bügen inde alay uq aktual tügel. Eşlämiçä dä bik tämle aşap bula. Tatar xatın-qızları bu xaqta ni uylıy soñ? Qazandağı xäbärçebez Albina Zäynulla "Aqçağız citärlek bulsa sez eşlämäskä rizamı?" digän soraw belän belän berniçä xanımğa möräcäğät itte. Cawaplarğa qarağanda, xatın-qızlar eşlämäskä riza tügel, berse dä. Alar äzräk eşlärgä riza. Ämma ireneñ aqça alıp qaytqanın kötep utıru – tatar xanımnarınıñ ğädäte tügel, birgäk tä icat keşeläre öçen. Britaniä ğalimnäreneñ mäğlümatlärenä tatar xatın-qızlarınıñ süzläre tağın ber dälil bulıp tora. Xanımnar eştä häm ğailädä – sälämätlekläre yaxşı bulğanı öçen genä uñışqa ireşmi. Alar eşlägännäre öçen häm uñğan äni häm xatın bulğannarı öçen sälämät bula.

Alsu Qormaş
XS
SM
MD
LG