Accessibility links

чәршәмбе, 7 декабрь 2016, Казан вакыты 15:28

Fänis Yarullin: Ğailäle keşe bäxetleräk bula!


Ğailä bäyrämen Bötendönya tatar kongressı Başqarma komitetı, anıñ qarşıdağı “Ğailä” fondı, “Tatarstan” teleradiokompaniäse häm Tattransgaz aksionerlar cämğiäte oyıştırdı. “Tatarstan” radiosınıñ “Par qanatlar” tapşıruında törle yıllarda qatnaşqan ğibrätle yazmışlı keşelär, ozaq yıllar däwamında bergä yäşägän bäxetle parlar, küp balalı ğailälär häm başqa töbäklärdän kilgän millättäşlärebez ğailä bäyrämeneñ qunaqları buldı. Bäyräm qunaqların qotlarğa Başqortstannıñ häm Tatarstannıñ xalıq artistı Färidä Qudaşewa, Tatarstannıñ xalıq artistı İlham Şakirov, Flyura Söläymanova, Zöhrä Säxäbieva, Zilä Sönğätullina häm başqalar.

Simvolik ğailä uçağın qabızğannan soñ, kiçädä qatnaşuçılar üzläreneñ yazmışların, tormışta kiçergän xällären söylädelär, yäşlärgä üget-näsıyxätlär dä citkerdelär. Ğailä bäyrämenä 40 yıl bergä yäşägän Tatarstannıñ xalıq yazuçısı Fänis Yarullin häm anı tormış iptäşe Nursöya xanım da kilde. Yıllar buyı invalid arbadağı şağirne tärbiälägän Nursöya xanımğa häykäl quyarlıq. Ämma şağir Fänis Yarullin bolay dide:

Häykällär bügen bar, irtägä yuq alar. İñ zur däräcä - xalıq küñelendä qalu. Nursöya bulmasa, min bu däräcälärgä ireşä dä almas idem. Ul berqayçan da kizüen taşlamağan kizüçe şikelle. Mine qulında yörtä dip simvolik räweştä genä äytmilär. Kön däwamında ul mine kim digändä 6 tapqır kütärergä mäcbür bula. Ğailäle keşelär bäxetleräk! Alar ozağraq yäşi dä, yözläre dä yaqtıraq bula.

Uzğan yılda kongress qarşında oyıştırılğan ğailä fondınıñ citäkçese, respublikanıñ xalıq deputatı häm yazuçısı Tufan Miñnullin üz çığışında milli ğailäneñ problemaları xaqında söyläde:

Yäşlärebezneñ 42%tı başqa millät wäkilläre belän tormışların bäyli. 4-5 bala bulsa, xällär alay uq qatlawlı bulmas ide, bälki. Ämma xäzer ber genä bala üsterälär, anısın da başqa millätlärgä biräbez. Şuña kürä bu problema bezneñ öçen ayıruça qurqınıç - ul millät yazmışı.

Uniksta uzğan ğailä bäyrämendä şulay uq Arça rayonı Taşkiçü awılınnan 12 bala üstergän Täbrik häm Täzkirä Gäläütdinovlar ğailäse, Yaña Urengoy, Ufa, İjau şähärlärennän kilgän bäxetle parlar da qatnaştı.

Al'bina Zäynulla

XS
SM
MD
LG