Accessibility links

пәнҗешәмбе, 8 декабрь 2016, Казан вакыты 23:08

Tatarstan belän Bangladeş arasında iqtisadi xezmättäşlek arta


Tatarstan säwdä häm tışqı iqtisadıy xezmättäşlek ministrı Xafiz Salixov küptän tügel üze Bangladeşta bulğan. Häm ul älege respublika belän duslıqnı arttırırğa kiräklegen yäşermäde, Bangladeş belän xezmättäşlek itü şaqtıy qızıqsındıruın – zur mömkinleklär wäğdä itüen äytte. Oçraşuğa Tatarstannan törle zur şirqat wäkilläre dä kilgän ide.

Soñğı yıllarda Bangladeş belän Tatarstan arasındağı iqtisadıy xezmättäşlek maqtanırlıq bulmağan. 1998 yıldan birle Tatarstan Bangladeşqa barı 16 boralaq, 4 KAMAZ maşinası ğına satqan. Bu bik az dip bilgeläp uzıldı oçraşuda. Häm Bangladeşnıñ iqtisat ministrı urınbasarı Güläm Xössäin monı Rusiä belän Bangladeş arasındağı iqtisadıy xezmättäşlek turındağı maxsus kileşüneñ bulmawı belän añlattı.

70нче yıllar başında Rusiä belän Bangladeş arasında kileşü bulğan, ämma anı yañartu sorala. Şulay uq oçraşuda ike respublikanıñ da şirqat'läre ber-berse turında mäğlümatlı tügel dielde. Kiläçäktä ike yaqlı tanışu säfärlären arttıru küzdä totıla.

Tatarstan säwdä häm tışqı iqtisadıy xezmättäşlek ministrınıñ berençe urınbasarı Linar Latıypov Bangladeş qunaqların Tatarstannıñ iqtisatı belän tanıştırdı – şirqat'lär turında söyläde. Güläm Xössäin Tatarstannıñ çağıştırmaça keçkenä respublika buluına qaramastan awıl xucalığı, yuğarı texnologiälärneñ üseş aluına soqlanu belderde. Kiläçäktä Tatarstannan KAMAZ maşinaları, boralaqlar satıp alırğa teläwlären, energetika ölkäsendä eşläwçelär belän elemtälärne nığıtırğa teläwlären äyttelär. Çönki Bangladeş respublikasında elektr energiäsenä qıtlıq ikän. Elek Sovetlar Soyuzı yärdämendä Bangladeşta ike elektr stansiäse tözelgän bulğan. Xäzer alarnı tözekländerü taläp itelä. Şulay uq gaz yärdämendä eşläwçe tağın elektr stansiäläre tözüne küzdä totalar Bangladeşta. Häm Tatarstan wäkillären cälep itmäkçelär.

Bangladeş isä Tatarstannıñ ciñel sänäğät ölkäsenä ütep kerergä uylıy.

Tatarstan bazarında 70 protsenttan artıq kiem-salım çit ilneke ikän. Xafiz Salixov

Sovet zamanında da bezneñ ciñel sänäğät üsmägän ide, xäzer bigräk tä.

Bangladeştan kilgän ciñel sänäğät assotsiatsiäse wäkilläre üzläre belän kürsätmä öçen tuqımalarnı da alıp kilgännär. Kiläçäktä Tatarstanda kürgäzmä oyıştırunı küzdä totalar.

Landış Xarrasova

XS
SM
MD
LG