Accessibility links

җомга, 9 декабрь 2016, Казан вакыты 14:30

Çallınıñ invalid sportçıları Mäskäwdä


Çallınıñ invalid sportçıları 1996 yıldan alıp İdel-Ural regionnarında, Qalmıq ilendä, Kavkaz respublikalarında buldılar, 2004 yılda "Berdäm Rusiä öçen" digän isem astında, uzğan yıl "Tatarstan-Qazaxstan" atvomobil' säfäre oyıştırdılar. Un yıl eçendä 6 säfär bulıp, atlarda, köymälärdä, maşinalarda 31 meñ çaqrım yul uzıp qayttılar. İnde menä invalid sportçılarnıñ Rusiädä barır urınnarı da qalmadı kebek. Yuq, barır urınnarı qalğan ikän äle anısı-Rusiä başqalası Mäskäw. 15 may könne, Çallınıñ Azatlıq mäydanınnan 12 invalid Oqa maşinalarında häm ber avtobus belän şuşı başqalağa yul tottılar. Säfär " Terrorizmğa-yuq" digän isem astında ütä häm bu süzlär avtobusnıñ mañğayına da zur itep yazıp quyılğan. Ciñel avtomobil'lärneñ artqı yağına " Avtoprobeg Naberejnıye Çelnı - Moskva" dielgän.

Yazular ber xäl, İdel-Ural fondı invalidları Rusiä prezidentı Vladimir Putin belän oçraşu xaqında da xıyallanıp, yulğa çıqtılar. Härxäldä, prezident apparatına " Terrorizmğa-yuq" dip isemlängän säfär xaqında, bügenge wäzğıättä invalidlarnıñ prezident belän oçraşu zarurlığı xaqında xäbär-mäglümätlär cibärelgän ikän. Xäyer, alarğa prezidentqa ğözerlären citkerergä nasıyp bulmasa da, ällä ni qayğırmaslar tösle. Çönki, Qazan, Çuaşstan,Mari ile, Tübän Novgorod Vladimir häm başqa şähärlär aşa uzaçaq bu säfärdä qızıqlı çaralar da qaralğan. Nindi alar. Bu xaqta avtoyöreştä qatnaşuçı, yumoristik kitaplar avtorı Fänis Nuretdinov Azatlıqqa bolay di:

-Bezneñ teläklärebez bik izge. Maqsatıbız-xalıqlar arasındağı duslıqnı nığıtu. Bälki äle Putin rezedensiäsendä dä qabul itärlär, äzräk üzebezneñ süzlärebezne äyterbez...

Ä menä säfärne oyıştıruçı, İdel-Ural fondı citäkçese Räkit Äbrelmänov, Vladimir Putin belän oçraşu bula qalğanda, nindi problemalarnı kütäräsez-digän sorawğa qısqa ğına itep, "İnvalidlarnı protezlau häm Oka maşinaları mäsäläsen"- dide, Räkit äfände älegä bu mäs’älälärneñ asılına añlatma birmäde.

Yulğa çığuçılarnı ozatu tantanasın da şähär xäkime urınbasarları, QamAZ citäkçeläre dä bar ide. Şähär şurası räise urınbasarı Xäydär Gälävetdinov säfärçelärgä- Maqsatlarığız tormışqa aşsın, ayıruça prezident V.V. Putin belän oçraşu telägegez- dide. " Terrorizmğa-yuq" säfärendä qatnaşuçılar Qazanğa barıp cittelär häm Çuaşstan başqalası Çabaqsarğa yul tottılar. 17 may könne Çabaqsardan Tübän Novgoradqa kitärgä niätlilär. Mäskäwne urap Çallığa qaytu 22 mayda dip farazlana.

Ğafiulla Ğaziz, Çallı

XS
SM
MD
LG