Accessibility links

җомга, 9 декабрь 2016, Казан вакыты 13:00

Qazanda Tatarstan jurnalistları cıyıldı


Qazanda 16 mayda respublikada inde berniçä yıl däwamında ütkärelep kilä torğan Media-forum açıldı. Anda tatarstannıñ mäğlümät çaraları wäkilläre, jurnalistlar qatnaşa, älege çara 19 mayda bilgeläp ütelä torğan respublika matbuğatı köne uñayınnan uzdırıla. Media-forumnı respublikanıñ Tatmedia agentlığı oyıştıra. Oyıştıruçılar süzlärenä qarağanda, bu çara Tatarstanda media bazarın üsterü, respublikada eşläwçe jurnalistlarnıñ hönäri belemen arttıru, zamança texnologiälär belän eşläwne arttıru, täcribä urtaqlaşu maqsatınnan buldırılğan.

Forumnıñ berençe könendä, sişämbedä Tatar jurnalistikasında terminnarnı qullanu mäs’äläläre digän fänni konferensiä buldı. 17se könne cıyın Tatarstan dulqınında televizion festivale belän däwam itte. Festival’ bıyıl inde 9 märtäbä uza. Qazannıñ Livadiä şifaxanäsendä ütä torğan bu çarada 30dan artıq töbäktän kilgän tele häm radiokompaniälär qatnaşa. Kilgän qunaqlar ber-berseneñ icatı belän tanışaçaq, bilgele, tanılğan jurnalistlar ütkärä torğan master-klasslarda belemen arttıraçaq. Töbäktäge mäğlümät çaraları wäkilläreneñ ostalığın kütärergä dip Qazanğa Mäskäwneñ NTV, Rossiä, Kul’tura kanallarınnan operatorlar, jurnalistlar, xäbärçelär çaqırılğan. Cirle ostalar da üzläreneñ belgännären öyrätäçäk. Festival’ qısalarında bäyge dä uza. Tatarstan-Yaña ğasır teleradiokompaniäse başlığı İlşat Äminev citäkçelegendäge jyuri täqdim itelgän 412 eştän iñ-iñlären saylap alaçaq. Ğädäti bulğan tatar häm rus tellärendä iñ äybät yañalıq, yäşlär programmaları, alıp baruçı, iñ yaxşı reklama roligı, kanal bizäleşe digän nominatsiälärdä ciñüçelärgä bıyıl tağın ber büläklänüçe östäläçäk. Tatarstanda 2006 yıl Ädäbiät häm sänğät yılı bulu säbäple festival’dä Tatarstan prezidentı tarafınnan bilgelängän büläk tä tapşırılaçaq. Anıñ öçen mädäniät turındağı programmalar yarışaçaq. Ciñüçelärne büläkläw häm festival’neñ yabılu tantanası 18 may kiçendä bulaçaq.

Monnan tış, pänceşämbe könne törle mäğlümät üzäkläre xezmätkärläreneñ seminarı da uzaçaq. Tatmedia agentlığınıñ brifinglar zalında alar Mäskäwdäge Jurnalistika häm mediabazar, Mäğlümät çaraları yañalıqları jurnalları citäkçeläre belän oçraşaçaq. 18 mayda İdel näşriät yortı yanında buldırılğan Mäğlümät çaraları alleyasında da bäyräm uzaçaq. Qunaqlar bıltır utırtqan ağaçları tiräsendä tözekländerü, alleyanı maturlatu belän şöğellänäçäk.

Xäyer, pänceşämbe köneneñ iñ qızıqlı çarası bulıp Tatar internetı forumı toradır. Ul üzeneñ eşen säğät 10da Bötendönya tatar kongressı binasında başlap cibäräçäk. Anda qatnaşuçılar internetnıñ tatar öleşeneñ problemaları, anı üsterü turında fikerläşäçäk. Bu çara turında bez sezgä kiläse tapşırularıbızda tulıraq itep söylärbez äle.

Mediaforumnıñ soñğı köne – 19 may programması da bik bay. Bu könne respublika mäğlümät çaralarınıñ baş möxärrirläre tatarstan citäkçelege belän oçraşaçaq. Alar Däwlät Şurasında jurnalist belän cirle üzidarälär mäs’äläsen tikşeräçäk. Piramida küñel açu üzägendä isä comğada Bällür qäläm respublika bäygesendä ciñüçelärne qotlaw tantanası uzaçaq. Älege bäyge dä tatarstan dulqınında kebek ük bıyıl inde 9 märtäbä ütä. Anda 10nan artıq nominatsiädä Tatarstanda iñ abruylı, tanılğan jurnalistlar, mäğlümät çaraları, iñ açıq mäğlümät üzäge, rayon gäcitläre, tele häm radioprogrammalar büläklänä.

Mediaforumnıñ eşe 19 may – Tatarstan matbuğatı könendä Bauman uramında oyıştırılğan Massaküläm mäğlümät çaraları uramı dip atalğan bäyräm belän tämamlanaçaq. Anda här telägän basma, teleradiokompaniä üzen xalıqqa täqdim itep, üze belän tanıştıru oyıştıra ala. Bu bäyrämdä mäğlümät çaraları wäkilläre qazanlılarğa törle qızıqlı bäygelär, täqdir itü çaraları täqdim itä, bay konsert programması da qaralğan. Şähärneñ Bauman uramındağı bäyräm kiçkä qädär däwam itäçäk. Çarağa kilä almawçılarğa da borçılırğa kiräkmi, oyıştıruçılar bäyrämne Yaña ğasır kanalınnan turı efirda kürsätergä wäğdä itä.

Gölnaz İlgizär

XS
SM
MD
LG