Accessibility links

җомга, 2 декабрь 2016, Казан вакыты 22:59

"Da Vinci" kodı inde kürsätelä başlağançı uq zur bäxäslär uyata


Soñğı aralarda törle icadi äsärlär häm filmnar tiräsendä ğawğa çığu ğädäti ber küreneşkä äylänep bara, xörmätle tıñlawçılar. Salman Ruşdineñ "İblis şiğerläre", Möxämmät päyğämbär sürätläre, Rim papası turındağı multfilmnar, Martin Scorcezineñ Ğäysä päyğämbär turındağı filmı - şuşı isemlekkä xäzer Hollywoodnıñ "Da Vinci kodı" digän filmı da keräçäk. Çärşämbe könne ul Cannes festivalendä kürsätelde, kiñ ekranğa isä ul dönya buylap atnakiç çığaçaq. İnde kürsätelä başlağançı uq katolik çirkäweneñ qayber citäkçeläre üz ömmäten anı qaramasqa, filmğa qarşı çaralar ütkärügä öndäp çıqtı.

Amerikan yazuçısı Dan Brownnıñ "Da Vinci kodı" digän äsäre nigezendä, küp kenä xristiannar fikerençä, dinne mısqıllağan uydırma yata. Qısqaça ğına äytkändä ul şunnan ğibarät - Ğäysä päyğämbär dini täğlümät iqrar itkänçä, yalğız bulmağan, ul asılda öylängän, anıñ xätta balası da bulğan, häm katolik çirkäwe şuşı xaqiqätne yäşerü öçen barın da eşlägän, üterülärdän dä qıyınsınıp tormağan.

Kitap üze basılıp çıqqannan soñ bar dönya buylap inde tawış quptarqan ide, xäzer şuşı äsärgä nigezlänep film töşerelde, anda Tom Hanks, Jean Reno kebek kürenekle uyınçılar qatnaşa häm ul atnakiç, maynıñ 18-endä kürsätelä başlayaçaq.

Filmnı töşerüçelär, tamaşaçı anda dönyadağı iñ saqlanğan, iñ ğäziz sergä şahid bulaçaq, ul ser şul xätle dähşätle ki, anı faş itü keşelek dönyası nigezlären qaqşataçaq, dip belderä.

Ämma älegä dönya başqa törle qaqşanularğa şahit. Xristiannarnıñ yuğarı citäkçelege üz ömmäten filmnı qaramasqa, anı kürsätügä qarşı protest çaraları ütkärügä öndi. Moña inde Vatican üze dä quşıldı. Andağı papa tirälege turında berniçä kitap yazğan jurnalist John Allen:

"Da Vinci kodı"n açıqtan-açıq tänqitläp Vaticannıñ inde cämğe 8 ähele çığış yasadı. Bu üzenä kürä ğäyre ğädäti ber xäl. Vatican kiñküläm mädäniat, äsärlär wä filmnar xaqında ğädättä andıy belderülär yasamıy. Ämma ägär dä sez kitapnı başta 45 million danädä satıp, annarı äle anıñ filmın da töşeräsez häm ul bik uñışlı bulır dip kötelä ikän, monı inde kürmämeşkä salışıp utıru mömkin tügel, şuña kürä dä bez xäzer Vaticannan şundıy belderülär işetäbez", di John Allen.

Uzğan atnada Rim papasına yaqın torğan arxipiskop Angelo Amato "Da Vinci kodı"n xristiannarğa qarşı yalğanğa tulı ber äsär dip atadı häm bar katoliklarnı anı qaramasqa öndäde. Amato süzlärençä, ägär dä şundıy yalğan häm xatalar Qör''ängä yäisä yähüd Hälakätenä qarata yasalğan bulsa, bu bar dönyanıñ astı öskä kilüenä kiterer ide. Katolik ärxäräyeneñ şuşı süzlärenä çärşämbedä çex kardinalı Miroslav Vlk ta quşıldı, ul da, ägär dä qissada Ğäysä urınına Möxämmät päyğämbär bulsa, möselmannar bar dönya buylap kinoteatrlarnı yandırır ide, dip belderde.

İnde telgä alınğan jurnalist John Allen alay da, katolik ruxaniläreneñ "Da Vinci kodı"na qarşı süzläre andıy köç qullanuğa çaqırmıy, dip uylıy.

"Arxipiskop Amatonıñ uyında cämäğät urınnarın yandıru, maşinalarnı äyländerü kebek andıy köç qullanunı totmawına minem imanım kamil. Ul barı tik katolik üzañın nığıtunı häm katolik ir wä xatınnarnıñ şul üzañı nigezlären yaqlaw kiräklegen genä küz aldında totqandır", digän faraz belderä Vatican turında kitaplar yazğan John Allen.

Kärim Kamal
XS
SM
MD
LG