Accessibility links

шимбә, 3 декабрь 2016, Казан вакыты 05:38

Şäymiev xatın-qızlarnı 3 bala tabırğa çaqıra


Rusiädä xalıq sanı kimüe 90 yıllardan başlansa, Tatarstanda älege protsess 2000 yıldan kilä. Şuşı waqıt eçendä respublika yaqınça 16 meñ keşesen yuğaltqan. 2-3 yıldan eşçe qullarnıñ citmäwe üzen bik sizderäçäk di belgeçlär. Älege mäs''älä Tatarstan citäkçelegen dä şaqtıy borçıy. Çärşämbedä uzğan qurqınıçsızlıq Sovetınıñ utırışında süz şul xaqta bardı. Ämma älege utırış yabıq işeklär artında uzdı. Citäkçelär ayırım qararğa kilmiçä, qayber bäxäsle mäs’älälärgä mönäsäbäten belderergä telämäde. Şuña kürä dä M.Şäymiewneñ kereş çığışınnan soñ, jurnalistlar öçen işeklär yabıldı.

Şunısı mäğlüm - Tatarstan prezidentı respublikadağı här xatın-qız öç bala tapsa, 2030 yılğa qädär wäzğıät yaxşıruğa taba baraçaq dip belderde.

Tatarstan xatın-qızları prezident quyğan burıçnı ütärgä äzerme? Menä alarnıñ cawapları:

-Öç bala küp tügel inde ul. Tabarğa bula. Ämma şartlar kiräk bit! Fatir, annarı balağa yuğarı belem birergä kiräk, yun''le meditsina xezmätläre kürsätelergä tieş. Ä alar yuq.

-Min üzem öç bala üsterdem inde. Bezneñ zamanda barıber niçekter caylıraq ide. Bezgä tülängän aqçalar citä ide. Xäzer bit ul aqçağa berni alıp bulmıy. Belmim üsterä alır mikän bügenge yäşlär.

-Şartlar bulsa, tabarğa bula inde. Öçne tügel, dürtne, bişne dä!

Şuşı xaqta “Azatlıq” xäbärçese ğalim, yuğarı uqu yortındağı ber uqıtuçığa da möräcäğät itte. Ul isä menä niçek uylıy:

Xatın-qıznıñ bu tormışqa kilüneñ töp maqsatı - bala tabu. Tatar xalqı elek-elektän balanı küp tapqan. Din alarğa tabiği protsesslarğa qısılırğa röxsät birmägän. Bügenge ğailä problemaları bezneñ Könbatış qimmätlären üzläşterüebez belän bäyle. Bez tabiğät''ne üzgärtergä tırışabız. Ämma bit ul Könbatış qimmätlär bezneñ ğailälärne beterügä kiterä. Şuña kürä kiräk mikän soñ alar bezgä?

Demografik wäzğıätne yaxşırtu öçen 2030 yılğa qädär respublikadağı här xatın-qızğa 3әр bala tabu täqdimen quyğan Tatarstan prezidentınıñ täqdime xaqında ğalim fikerläre buldı.

Albina Zäynulla

XS
SM
MD
LG