İran prezidentı Mäxmüt Äxmädinicat Tähran Yewropanıñ uran bayıtunı tuqtatu öçen almaşqa täqdim itkän çaraların kire qağa dide.
Bügen televidenie aşa kürsätelgän çığışında Äxmädinicat Yewropa Berlegeneñ täqdimen berniçä çikläwek belän şokoladnı altınğa almaştıru dip atadı.
Ul Tährannıñ uran bayıtudan baş tartmıyaçağın häm anı tuqtatmayaçağın belderde.
Yewropa Berlege Tähran uran bayıtunı tuqtatqan oçraqta aña atom elektr stansiäsenä iä bulırğa yardäm itäçägen beldergän ide.
Diplomatlar äytüençä, xäzer Britaniä, Fransiä häm Germaniä İranğa ciñel suda eşläwçe atom reaktorı da täqdim itärgä cıyına.
Rusiä tışqı eşlär minsitrı Sergey Lavrov İran üzeneñ atom programmasına bäyle qarşılıqqa çişeleş bulırğa mömkin xalıqara täqdimnärgä konstruktiv cawap birergä tieş dide.
Yewropanıñ täqdime turında Lavrov "Bez anı yaqlıyaçaqbız häm İran aña konstruktiv cawap birer dip ömetlänäm. Bu wäzğiätkä çişeleş tabu öçen berdän-ber yul dip isäplibez" dide Lavrov.
Lavrov şulay uq İranğa qarşı çikläwlär turında uylarğa äle bik irtä dide
Yewropa Berlege belän AQŞ, İrannıñ kire qağuına qaramastan, Tähran atom qoralı yasarğa tırışa dip isäpli.
