Accessibility links

пәнҗешәмбе, 8 декабрь 2016, Казан вакыты 19:20

Omskida milli mädäniät çaraları


İnde cäyge yallar yaqınlaşıp kilügä qaramastan Omskida milli yünäleştä alıp barılğan eşlär sürelmi, may ayında xätta kiresençä, uzğan aylarğa qarağanda canlanış ta aldılar. Säbäbe şunda ki, ölkädä ütkärelä torğan milli mädäniätlär festivale programmasında ay axırında tatar-başqort mädäniäte könnäre ütkärü qaralğan. Bu eştä töp cawaplılıq milli oyışmalar belän eşläwçe Duslıq yortına yöklängän. Yıldan-yıl törle millätlärneñ bäyrämnären ütkärep şaqtıy şomarğan älege oyışma xezmätkärläre xäzer tatar oyışmaları aktivistları belän berrättän ciñ sızğanıp eşkä kereştelär. Çärşämbe könne tatar oyışmaları citäkçeläre Duslıq yortında cıyılıp, tatar-başqort mädäniäte könnäreneñ programmasın tögällädelär, cawaplı keşelärne bilgelädelär.

Tatar-başqort mädäniäte könnäre 23-nçe maydan 3-nçe iyüngä qädär baraçaq. Programma qısalarında söyekle şağirebez Ğabdulla Tuqaynı, legendar şäxes Musa Cälilne iskä alu, törle xäyriä çaraları ütkärü, şul isäptän Balalar Yortında çığış yasaw, seminar-uqular oyıştıru häm “Yaña yoldız” dip isemlängän balalar cır konkursın ütkärü qaralğan. Şunsın da assızıqlap ütärgä mömkin, bu çaralar şähär külämendä genä bulıp qalmıyça, awıl-rayon cirlärenä dä barıp citäçäk.

Tatar oyışmaları aktivistları mädäniät könnären ütkärügä äzerlek belän mäşğül' bulsalar da, şähärdä ütkärelgän törle millätara çaralarda qatnaşırğa da waqıt tabalar. Şundıy, tatar aktivistları qatnaşqan çara –tügäräk östäl utırışı şimbä könne Seber yağında yäşäwçe xalıqlarnıñ mädäniäten üsterü xäyriä fondı “Watanım Seber” tarafınnan ütkärelde. Älege fond oyışıp eşli başlawınıñ 5 yıllığın bilgeläde, aktiv ägzälären räxmät käğäzläre belän büläkläde, başqarılğan eşlärenä yomğaq yasadı, aldağı eş plannarın qaradı. Anda çığış yasawçılarnıñ küpçelege, bügenge köndä Rusiädä sotsial' problemalarnıñ xökümät tarafınnan naçar xäl itelä, törle problemalar barlıqqa kilgändä keşelärgä yärdämne şäfqät'le eşmäkärlärdän häm xäyriä fondlarınnan kötärgä qala, dip assızıqladı.

Watanım Seber” fondı äğzälärenä ber qızıqlı mäğlümat tä citkerelde. Fondnıñ direktorı, Rusiä Däwlät Duması deputatı Oleg Smolin kürmäwçe deputat bularaq Dumağa 5-nçe märtäbä saylanğanı öçen Genneslarnıñ rekordlar kitabına kertelgän. Bu xaqta fondnıñ başqaruçı direktorı Ol'ğa Fedyäyewa belderde.

17 may könne şähär xakimiäte milli oyışmalar citäkçelären kiñäşmä utırışına cıydı. Anda şähärneñ mädäniät uçaqların tözekländerü sorawları qaraldı, kitapxanälär torışı, milli oyışmalarnın ixtiäcların isäpkä alu kebek sorawlar tikşerelde. Tatar milli-mädäni möxtäriäte tarafınnan ölkä kitapxanäsendä milli, şul isäptän tatar kitapları bülege buldıru zarur dip täqdim yasaldı. Mondıy täqdimne başqa milli oyışmalar citäkçeläre dä xupladılar.

Tatar aktivistları qatnaşqan tağı ber çara – Omskinıñ 95-nçe sanlı ğomumi belem mäktäbendä kiñ külämdä ğailä könen bilgeläw. Şunısı iğtibarğa layıq – anda törle millätlär ğailäläre kürsätelde, milli rizıqlar täqdim itelde. Älege çaranıñ konsert öleşendä milli kollektivlarnıñ çığışları da buldı. Bu çarada tatar mädäniäten “Umırzaya” ansamble qarşında eşläwçe “Ömet” törkeme yäşläre kürsätte.

Rozaliä Sayganova, Omski

XS
SM
MD
LG