Accessibility links

дүшәмбе, 5 декабрь 2016, Казан вакыты 23:52

RİUda bäxäs: Qazan mişärlär öyrätep yörügä moxtac tügel


Rusiä İslam universitetında pänceşämbe könne tağın ber cıyılış uzdı. Ul, Möselman mäğärif sistemasında dini häm dönyawi komponentlar dip ataldı. Läkin, fänni cıyılış, älege dä bayağı RİUnıñ kiläçägenä törtelep qaldı häm axırda qaynar ğına bäxäslär dä buldı.

İslam universitetındağı älege forum islam dine turındağı yaña kitaplarnı täqdim itüdän başlandı. Ä kitaplar şaqtıy ğına ide. Läkin, berençelektä Qazan tügel, ä ni ğäcäp Tübän Novgorod tora. Andağı Diniä näzaräte oyıştırğan Mädinä näşriäte islam, tatarlar tarixı, ictimaği fiker buyınça 9 lap kitapnı täqdim itügä alıp kilgännär. Älege näşriätneñ mödire Damir Möxetdinov, üze dä kilgän. Monnan tış, Tübän Novgorod ölkäse möftie Umär xäzrät İdrisov, ölkädäge tatar-milli mädäni möxtäriäte räise, şulay uq mulla Ğayaz zakirov ta cıyınnıñ tör başında utırdılar. Şulay uq, bu aralarda ğına üzeneñ 80 yäşen bilgeläp ütkän ğalim häm cämäğät eşleklese Mirza Mäxmütovnıñ da sallı ğına bulğan yaña ber kitabı belän tanıştırdılar. Ul İslam dönyası dip atala. Urıs telendä.

Annan soñ, forumğa kilgän ğalimnär möselman mäğärif sistemasında dini wä dönyawi fännärne uqıtu mä’säläsenä küçtelär. RİU öçen bu bik tä aktual'. Çönki, xäzerge waqıtta anda bäxäs tä şul xaqta bara. Bu uqu yortı islami bulamı – ällä dönyawimı. İnde mäs’älä xäl itelde dip kenä torğanda, yäğni dönyawi bulır digän qara qılındı digändä genä, bu forumda tağı şul mä’sälädä bäxäs quptı. Tübän Novgorodtan kilgän möfti häm anıñ yärdämçeläre, dönyawi bulsın dip bara. Çuaşstan möftieneñ bu mäs’älädä fikere açıq itep äytelmäde, ul küp söyläde, läkin añlaşılmadı. Ä Tatarstannıñ elekkege möftie Ğabdulla xäzrät Ğaliulla isä, bu İslami uqu yortı bularaq tözelde, şulay bulıp qalırğa tieş tä dip çığış yasadı. Şunnan bäxäs kitte. Uqu yortın taşlap kitkän şäkertlär isemennän elekkege rektor Ğosman xäzrätneñ enese çığış yasadı. Şulay uq islami bulsın dip bara. Alarğa töple cawapnı RİU rektorı İldus Zahidullin birep bardı. Läkin, islami uqu yortı tözergä telägän taraf barıber şaw –şu belän kitep bardılar. Axırda, islamilarnıñ, Tübän Novgorod möftie Umär İdrisovqa qarap äytelgän süzläre genä işetelde. Axa, monda bezne tağın mişärlär öyrätep yörime digän.

Räfis Cämdixan

XS
SM
MD
LG