Accessibility links

сишәмбе, 6 декабрь 2016, Казан вакыты 03:52

Jurnalistlar Bällür qälämle buldı


Respublika xakimiäte belän ictimaği oyışma bulğan Jurnalistlar berlege inde 9nçı yıl bu bäygene oyıştırıp kilä. Yıl sayın, däräcäsen arttırırğa tırışalar. Qatnaşuçılar sanı da arta bara, häm şunnan jyuri layıqlı dip tapqannarın sawlap büläkli. 19 mayda isä, Tatarstan jurnalistları könendä zur mäcles yasap, maxsus çaqırular belän genä kertep, Piramida da büläklilär.

Bıyıl bu büläkläw tantanalarına Mäskäwdän dä qunaqlar kilgän ide. NTV, Rusiä kanallarınnan tanılğan jurnalistlar. Alarnı başta üzlären büläklädelär, Qazannıñ meñ yıllığı medale belän. Bıltır meñyıllıq waqıtında alar Rusiä külämendä bäyrämne yaqtırtqannar ikän. Annan soñ alar üzläre dä törle nominatsiädä ciñüçelärne qotladılar. Monnan tış, qayberläre, Tatarstannıñ üz jurnalistika mäktäbe bar dip tä belderde.

Çarada Tatarstan räsmiläre dä qatnaştı. Premyer Miñlexanov ta, anıñ urınbasarı, mädäniät ministrı Zilä Wälieva da. Häm älbättä inde, oyıştıruçı çinovniklar, vitsespiker Rimma Ratnikova häm Tatmedia xucası Marat Moratov. Qazan merı İlsur Metşin da buldı.

İnde büläkläw çaralarına kilgändä. Bıyıl büläklär aluçılar küp buldı. Şularnıñ qayberlärenä tuqtalıp ütik. Jurnalistikada isem dip atalğan nominatsiädä mäsälän, ğömere buyı räsmi matbuğatta häm räsmilärgä yaqın urınnarda eşlägän Lyubov'' Ağeeva, ğömere buyı jurnalist bulıp eşlägän häm Jurnalistlar berlegendä citäkçelärneñ berse bulğan Yuriy Xanjin kebeklär bar. Ğomumän räsmi matbuğat wäkilläre büläklänüçelär arasında kübräk ide. Nişliseñ, däwlät orğanı oyıştıra bit. Läkin, räsmi bulmağan jurnalistlar da büläk aldı. Mäsälän, Azatlıqnıñ Qazan bülege citäkçese Rimzil Wälievnıñ Татары у себя дома dip atalağan kitabı öçen, jurnalist – kitap avtorı nominatsiäsendä Bällür qäläm belän büläklände. Bu nominatsiädä tağın ike avtor yäki avtorlar kollektivı bilgeläp ütelde. Şularnıñ berse Cıyın fondı. İlham Şakirov turındağı kitap öçen. Ä büläklärne, kitap avtorlarına İlham Şakirov üze tapşırdı.

Bällür qäläm tantanasında Şvetsiä patşalığınıñ Rusiädäge ilçese Yuxan Mulander da qatnaştı. Ul, Şvetsiädäge jurnalistlarnıñ niçek irekle itep eşläwe turında söyläde. Bu çığış tantanada qatnaşqan däwlät gäzitläre jurnalistlarına küp yañalıqlar alıp kilde şikelle, çönki, bilgele inde, 18 ğasırda uq matbuğat irege turında qanun qabul itkän il belän Rusiä eçendä yäşägän, äle sovet ise añqıp torğan Tatarstan ber tügel. Bezneñ jurnalistlar qızıqsınıp tıñladılar.

Çit töbäktä çığıp kilüçe tatar matbuğatı da büläksez qalmadı. İjaudağı tatar matbuğatı ähelläre isemennän İrek Şäripov, Mäskäwneñ Tatarskie novosti gäzite jurnalistı Dinä Aläutdinova häm Başqortstannıñ Ömet gäzite Tuğan tel nominatsiäsendä büläklände. Alarğa büläkne, Watanım Tatarstan gäzite baş möxärrire Miñnazıym Säfärov tapşırdı.

Tantana mäcles belän aralaşıp bardı. Soñınnan premyer respublika matbuğat tarixında üz urının totqan Marsel Zaripovqa maşina büläk itte. Tantananıñ tağın ber üzençälege şunda buldı, ällä Mäskäwdän kilgän urıs jurnalistları xörmätenä, ällä başqa säbäp buldımı, nigezdä urısça ğına bardı. Alıp baruçılar tatarça söyläde anısı, läkin, ğömere buyı tatar matbuğatında eşlägän jurnalistlarnıñ da, belär-belmäs urısça söyläwläre ğäcäyep ide. Tağın ber üzençälek bar, ul ad bulsa, başqa yıllarda Piramidanıñ ike qatında da qunaqlar utırsa, bu yılnı zatlı aşlar häm eçemleklär belän sıylanuçılar berençe qatqa da sıyıp bette. Bu tantana ciñüçelär häm jurnalistika hönärendä siräk bulsa da oçrıy torğan zurlawğa layıq buluçılar öçen matur ğına bäyräm buldı. Ä başqalar, qäläm häm mikrofon ostaları uramda, xalıq arasında yal itte.

Ä bıyıl Älmättän kilgän jurnalistlar Bällür qäläm bäygese turında cır da çığarğannar ikän. Anısı ike teldä ide, şul Älmätlelär başqardı.

Räfis Cämdixan

XS
SM
MD
LG