Bu könnärdä cämäğätçelekkä täqdim itelgän Da Vinci Code filmın yasawçılar Beslan mäktäbe faciğası turında film töşerergä niät beldergän. Britaniäneñ Guardian gazetı yazuınça, Da Vinci Code produserı Brian Grazer häm Hollywoodnıñ Universal Pictures digän studiäse Esquire jurnalında dönya kürgän totıq alu waqiğäse turındağı mäqälädän scenariy yazırğa xoquqnı satıp alğan. Mäqäläne New York Times gazetı xäbärçese Chris Chivers yazğan bulğan. Ul 2004nçe yılda Beslan waqiğälären dä yaqtırttı. Produser Grazer, bu waqiğa zur ekranğa çığarğa tieş, dip belderde.
