Accessibility links

якшәмбе, 4 декабрь 2016, Казан вакыты 09:11

Möselmannar şurası utırışı bulıp uzdı


Bu könnärdä Sverdlovski ölkäseneñ Mixaylovski şähäre mäçetendä möselmannar şurasınıñ öçençe utırışı bulıp uzdı.

Tatarlar tuplanıp yäşi torğan rayonnarnıñ berse bulıp sanalğan Mixaylovski okrugında möselmannar şurası yaña saylanğan xakimiät başlığı Sergey Yakimov initsiativası belän oyıştırılğan ide. Milli üzäk citäkçese Fazilä xanım Möcipova äytüençä, Sergey Mixayloviç bik keşelekle, milli mä’sälälärgä citdi iğtibar birä torğan keşe.

Yaña oyıştırılğan möselmannar şurasında yaqın-tirädä urnaşqan tuğız awılnıñ mäçetlärendä eş alıp baruçı imamnar häm här awıldan milli aktivistlar eşli. Barlıq utırışlar häm cıyılışlar Mixaylovski şähäre mäçetendä alıp barıla.

Sverdlovski ölkäse möselmannarınıñ Qazıylat idäräse citäkçelege tırışlığı belän, küptän tügel Mixaylovski şähärendä yäş kenä uqımışlı imam eşli başladı. Şähär möselmannarı yäş imam turında bik yuğarı fikerdä. Üzeneñ tırışlığı, itağәt'lelege, kürkäm xolqı belän ul qısqa ğına waqıt eçendä xörmät qazanğan.

Rinat xäzrät eşli başlağaç, mäçetkä yörüçelär dä kübäyde dilär. Töp eşe belän bergä, yäş xäzrät awıllarda eşläwçe imamnarnıñ belemen üsterügä küp köç quya ikän. Bu eştä aña Qazıyat idäräse zur yärdäm kürsätä. Monnan tış, Qazıyat idäräse din ähelläre öçen administrativ-xoquqi däreslär oyıştıruğa zur iğtibar birä.

Soñğı utırışta da imamnar aldında alarnıñ xoquqları, wäqälätläre, burıçları turında çığış yasadılar, kiräkle kürsätmälär öläştelär. Annan soñ törle xucalıq problemaların xäl itü buyınça fiker alıştılar. Dini oyışmalarnıñ räsmi terkälü käğäzlären barlawdan başlap, mäçetlär öçen qışqılıqqa utın äzerläwgä qädär bulğan mäs'älälär qaraldı. Şulay uq yäş buınnı äxlaqi ruxta tärbiäläw eşen däwam itü buyınça yaqın kiläçäkkä eş yünäleşläre bilgelände.

Balalarnıñ cäyge yalı çorında tatar awılları mäktäplärendä dini seminarlar uzdıru, Ufa yılğası yarında cäyge lager' oyıştıru, yaqın-tirädäge awıllar bergä cıyılırlıq itep zurlap cıyınnar ütkärü turında süz alıp barıldı.

Sverdlovski ölkäse möselmannarınıñ Qazıyat idäräse citäkçeläre bu eştä Mixaylovski okruğı möselmannarına häryaqlap yärdäm kürsätäçäk.

Fäwiä Safiullina,Yekaterinburg

XS
SM
MD
LG