Äfğänstannıñ Kandahar wiläyäte başlığı Asadulla Xalid Kandahar şähäre yanında Taliban suğışçıları yäşerengän urınğa uzğan töndä hawa höcüme buldı, 80-läp taliban suğışçısı 16 sivil üterelde dip belderde.
Şahitlär äytüençä, ber atna çaması däwam itkän qatı bäreleşlärdän soñ taliban suğışçıları kerep yäşerengän mädräsäne boralaqtan utqa totqannar.
Şahitlär äytüençä Taliban yaqındağı yortlarğa qaçqaç koalitsiä boralaqları anda da ut açqan.
Kandahardağı Azatlıq xäbärçese Cäwit Äxmät Wafa ber awılda älege höcüm näticäsendä tınıç xalıq arasında da yaralanuçılar buldı dide.
"Yaralanuçılar arasında cirle tınıç xalıq wäkilläre dä bar. Kandaharnıñ Mirwais xastaxanäsenä ul awıldan 15 keşe kiterelgän. Tabiblar äytüençä, qayberläre qatı yaralanğan. Aralarında xatın-qızlar da balalar da bar" dide Wafa.
Kandahar yanında Taliban suğışçılarınıñ hawadan utqa totıluın AQŞ xärbiläre dä rasladı.
