Tatarstanda UNESCO belän xezmättäşlek itüçe ike yuğarı uqu yortı bar. Şularnıñ berse - Tübän Qama şähäreneñ munitsipal' institutı. UNESCO - Berläşkän millätlär oyışmasınıñ mäğärif, fän, mädäniät yünäleşendä eşläwçe ber tarmağı. Bıyılnıñ 17 aprelendä, Tatarstan ministrlar kabinetınıñ 183 sanlı qararı nigezendä, mäğärif häm fän ölkäsendä xezmättäşlekne nığıtu yünäleşendä Respublikada UNESCO eşläre buyınça komissiä tözelä. Komissiä eşçänlege öçen Tatarstannıñ mäğärif häm fän ministrlığı cawaplı. Bu qararnı premyer-ministor Röstäm Minnexanov imzalağan. Döres, monnan ber yıl çaması elek Rusiäneñ tışqı eşlär ministrlığı Rusiä fännär akademiäse belän kileşü nigezendä Tübän Qamada Berläşkän Millätlär Oyışmasınıñ kafedra filialın açqan ide. İnde menä, respublika ministrlığı qararınnan soñ ozaq ta ütmäde. UNESCO kafedrasınıñ Tübän Qama filialında xalıqara fänni - ğämäli konferensiä dä ütkärelde. Älege forum " Rusiä xalıqlarnıñ etnodidaktikası" iseme astında. Närsä ul etnodidaktika? Bu xaqta beraz soñraq, ä xäzer, UNESCO kafedrası filial citäkçese Färit Yalalovnıñ xalıqara oyışma belän xezmättäşlekneñ başı turında Azatlıqqa äytkän süzläre:
- UNESCO tarafınnan tözelgän kafedralar ( 200 dän artıq, ikese- Tatarstanda) uqıtu, fän häm mädäniät ölkäsendä dönyaküläm eşlärne koordinatsiäli. Härber ilneñ täcribäsen öyränep, başqa illärdä citkerü küzdä totvla.
Professor Färit Yalalov äytüençä, etnodidaktiqa digän terminnı üze qullanışqa kertep cibärgän. Etnodidaktika xalıqlarnıñ uqıtu täcribäsen öyränä. Ğalim bu yünäleşkä üze açıqlıq kertä :
- Härber xalıqnıñ uqıtu ürnäge bulğan. Tatar xalqı mäğärif ürnäge belän dä tanıştım, öyrändem. Tatar mädräsälärendä uqıtu däräcäse yuğarı bulğan.
Professor Färit Yalalov monnan berniçä ğasır elek tatarlarnıñ mädräsälärdä, Rusiä uqu yortlarında, şulay uq çit il universitetlarında layıqlı belem aluların öyränü, dälilläw belän mäşgul' häm xäzer bu xaqta xalıqara mönbärlärdä dä çığış yasıy.
Tatar şäkertläre häm studentları monnan 2-3 ğasır elek ni räweşle belem alğannar.? Färit äfändeneñ bu xaqtağı fikerläre aldağı tapşırularda.
Ğafiulla Ğaziz, Çallı
