Accessibility links

Mäskäw: Abxaziä öçen bäysezlek referendumı äybät, Tatarstan öçen - yuq


Montenegrodağı bäysezlek referendumın, häm bigräk tä kiläçäktä Kosovonıñ da Serbiädän çığu ixtimalın Mäskäw Rusiägä quşılırğa telägän Abxaziä, yä Könyaq Osetiä oçrağı öçen qullana aluına işarälär yasasa da, üzendäge Çeçnä nizağı öçen isä andıy bäysezlek referendumın ütkärü mömkinlege turında ul läm-mim. Bülenep çığu problemaların xäl itüdä Rusiä iketörle standart qullanamı - şundıy soraw belän bez Mäskäwdäge "Heritage Foundation" digän tikşerenü üzäge mödire Yevgeni Volkka möräcäğät ittek.

Sişämbe könne Rusiäneñ tışqı eşlär ministrlığı Serbiädän ayırılıp yäşärgä telägän Montenegronıñ referendumdağı saylawın xörmät itüen belderde. Dönya xaritasında yaña däwlät päyda bulaçağına Abxaziä belän Dnestr buyı xakimiate dä quanuın xäbär itte, alar Montenegronı üzläre öçen ber ürnäk itep kürä, yäğni kiläçäktä üzläreneñ dä şulay itep berençe oçraqta Gruziädän, ikençe oçraqta Moldovadan bülenep çığuın küzallıy. Çärşämbedä Tiraspol'' ğomumän Moldova belän konfederatsiä qoru turındağı elekke qararınnan waz kiçüen iğlan itte. Rusiä citäkçeläre älegä qädär yasap kilgän belderülärendä andıy ixtimalğa nigezdä uñay qarawın äytä. Ä menä näq şundıy uq bäysezlek referendumın Çeçnädä ütkärü mömkin bulır ideme? "Heritage Foundation"neñ Mäskäw bülekçäse mödire Yevgeni Volk:

"Rusiä andıy bäysezlek referendumnarın üzenä kiräk bulğanda, mänfäğätlärenä turı kilgändä genä yaqlıy. Ä inde il eçendä ul moña bötenläy yul quya almıy, çönki bu cämäğät fikeren üzgärtü häm aña tä''sir oçrağında da kötelmägän näticälärgä kiterä ala", dip añlata Rusiäneñ bäysezlek referendumnarı ölkäsendäge iketörle standart alıp baruın Yevgeni Volk.

Ä menä, misal öçen, bügenge Çeçnädä, Montenegrodağı kebek Könbatış yaqlawı belän bäysezlek referendumı mömkinme, digän sorawğa Volk bolay di:

"Çeçnädä referendum ütkärü bügenge köndä çepçi hipotetik bernärsä, şuña kürä dä biredä Könbatışnıñ mönäsäbäte turında söyläw hiç mömkin tügel. Çeçnä xäzer tulısınça Rusiä qaramağı astında, anda bäysezlek referendumı uzğan oçraqta da, näticälär aldan uq bilgele bulır ide, çönki Çeçnädä irekle wä ğädel tawış birü mömkin tügel", di Mäskäwdäge "Heritage Foundation" üzäge mödire Yevgeni Volk.

Rusiäneñ bäysezlek referendumnarı mäs''äläsendäge ikeyözlegen zurraq möstäqillekkä omtılğan Tatarstan misalı da yaxşı sürätli - anda 1992-nçe yılda uzğan häm xalıqnıñ 61.4 protsent yaqlawın qazanğan referendum näticäsen Mäskäw berqayçan da tanımadı.

Kärim Kamal
XS
SM
MD
LG