Accessibility links

Semberdä yäşüsmerlär arasında milli köräş bäygese


Avtonomiä prezidiumınıñ soñğı utırışında töp mäsälä itep Sabantuyğa äzerlänü quyılğan ide. Ul iyünneñ 17 bilgelände. Utırışta keçkenä bäxäs tä bulıp aldı. “Sember” isemle maltabarlar klubı citäkçese Färit Äyupov Sabantuy batırına maşina büläk itü täqdime belän çıqtı. “Tuğan tel” oyışması wäkilläre isä milli bäyrämebezne anıñ töp asılınnan – ruxi baylıqnı nığıtu maqsatınnan çitlätügä qarşı çıqtılar. Mäsälän elek Sabantuy batırı öçen iñ zur büläk awılğa töşkän iñ uñğan kilenneñ çigüle sölgese bulğan. Häm, älbättä inde, qızlar mäxäbbäte. Şulay uq Sabantuynıñ töp maqsatlarınnan berse – Ölkä batırın açıqlaw. Ä oluğ büläklär isä çit-yat professional köräşçelär öçen genä faydalı.

Utırış büläklär yağınnan tıynağraq bulırğa qarar qıldı. Ä Tatar mädäni üzäge citäkçese Gölsinä Gerasimova “Çikkän sölgem – küñel közgem” digän bäyge iğlan itäçägen belderde. Bu bäygegä yomğaq iyünneñ 15 yasalaçaq.

Sabantuyğa äzerlek yözennän 1988-1990 yıllarda tuğan yäşüsmerlär arasında irekle köräş buyınça 2-nçe açıq ölkä bäygese uzdı. Anı atqazanğan sport masterı, Awrupa çempionı, Dönya kubogı (qabı) iäse köräşçe Minsäyet Tacetdinov oyıştırdı. Bäygedä Qazannan – 7 häm Minsäyetneñ tuğan yağı Çuaşstannan 6 yäş köräşçe qatnaştılar. 85 kiloğa qädär awırlıq buyınça Qazan yegete Röstäm Zäynullin 1-nçe urınğa çıqtı. Ä Çuaşstan yäşläre arasında üz awırlıqları buyınça 1-nçe urın yaulawçılar bulmadı. 6 awırlıq buyınça Sember qalasınıñ 7-nçe häm 9-ınçı Yäşüsmerlär sport mäktäpläre şäkertläre berençelekne yawladılar. 55, 60, 75 kiloğa qädär awırlıqlı köräşçelär arasında ciñüçelärneñ isem-familiäläre bezneñçä yañğıramıy. Şulay da 50 kiloğa qädär iñ yäş köräşçelärdän Ayrat Xäliullovnıñ ciñep çığuı nigezdä tatarlardan torğan tamaşaçıda zur qänäğätlek xise tudırdı.

Bäygene açu tantanasında Minsäyet Tacetdinovnıñ trenerı Nuriazdan Aliev, gubernatornıñ kiñäşçese Färit Äyupov häm Ölkä sport komitetı wäkilläre dä qatnaştılar. Şunısı da möhimder: Näq şul Sport komitetı bäyge çığımnarın üz östenä alğan. Härxäldä, büläklär, maqtaw käğäzläre anıñ isemennän öläşelde.

Ayrat İbrahim, Sember

XS
SM
MD
LG