Accessibility links

Кайнар хәбәр

Ulyan ölkäseneñ Qаrsun rayonında Balalar sänğäte festivale uzdı


Sport yarışınnan ayırmalı bularaq, “Sember qarlığaçları” isemle balalar icatı festivalendä bıyıl ciñüçelär bilgelänmäde. Häm bu yañalıq tınıç qabul itelde. Säbäbe dä yuq tügel. Berençedän, saylap alıp, yuğarıraq däräcäle şundıy çarağa yünältü qaralmağan ide. İkençedän, uzğan yıllarda ciñüçelärne barlawda ğädelsezlek kürüçelär dä bulğaladı. Bu yulı üpkäläwlär, isbatlawlarğa nigez tabılmadı.

Çınlap ta, çığış yasağan 102 baladan iñ yaxşıların saylap alu – üze ük bik çiten ğämäl. Yıraq aralarnı yaqın itep kilgän balalar qänäğät taraldılar. Härbersenä, tıynaq qına bulsa da, büläklär öläşelde, diplomnar tapşırıldı.

Bıyılğı festival''neñ tağın ber üzençälege – anıñ ölkä üzägendä tügel, Qarsun rayonı Nuğay ile awılında uzuı. Mädäniät yortınıñ şığrım tulı buluı da – küñelle küreneş. Yuğisä, Semberneñ üzendä uzğan mondıy çaralarda, ğädättä tamaşaçı bik az bula bit. Monısı oyıştıru sälätennänme, xalıqnıñ bitaraflığınnanmı – äytüe qıyın. Ä Nuğay ile Mädäniät yortında rayon üzägennän, kürşe Aqsu, Urazovqa awıllarınnan da xalıq küp kilgän.

Festival''dä tatar küpläp yäşägän İske Kulatkı, Yaña Malıqlı, Çınlı, İske Mayna, Ul''yanov, Çardaqlı, Nikolaev, Sengiley häm, älbättä inde, Qarsun rayonınıñ üzennän häm ölkä üzägennän kilgän balalar qatnaştı. Tatar mädäni üzäge direktorı Gölsinä Gerasimova kiläse yıllarda da mondıy çaranı awıllarda oyıştıraçağın belderde.

Ayrat İbrahim, Sember

XS
SM
MD
LG