Accessibility links

җомга, 9 декабрь 2016, Казан вакыты 10:46

Omskida tatar mädäniäte könnäre köz köne bulaçaq


Elek xäbär itkänebezçä, Omskida 23 maydan 3 iyüngä qädär tatar-başqort mädäniäte könnäre ütkärelergä tieş ide. Mädäniät könnäre ölkädä bara torğan milli mädäniätlär festivale programmasına kertelgän häm anıñ qısalarında ütkärelä torğan çaralarnı däwlät byudjetınnan finanslaw qaralğan. Çaralarnı ölkädä eşläp kilüçe tatar ictimaği oyışmaları köçe belän oyıştıru küzdä totıla. Ämma töp oyıştıruçı bulıp tatar oyışmaları tügel, ä milli-mädäni üzäklär häm möxtäriätlär belän eşläwçe “Duslıq yortı” tora. Äytergä kiräk, tatar mädäniäte könnärenä äzerlek ber niçä ay buyına bardı, ütkäreläçäk çaralarnıñ programmaları tözelde, cawaplı keşelär bilgelände, awıl-rayonnarğa xäbär itelde, qayber çaralarğa alarnıñ da cälep iteläçäkläre turında belderelde, repetitsiälär ütkärelde häm başqa küp törle äzerlek eşläre alıp barıldı. İnde äzerlek eşläre tämamlanıp, start alu köne kilep citkäç, niätlängän çaranıñ, yäğni tatar mädäniäte könnäreneñ bilgelängän waqıtta bulmayaçağı mäğlüm buldı. Döres, bez anı ütkärüdän baş tartmıybız, ä çaralarnıñ barsın da közgä, sentäber ayına küçeräbez didelär, milli oyışmalar belän eşläwçe “Duslıq yortı” xezmätkärläre.

Bilgele ki, bu xäbär mädäniät könnärenä citdi äzerlängän häm küp eşlärdä balalarnı da cälep itkän, çaralarğa xalıqnı çaqırğan tatar oyışmaları citäkçelären aptıraşta qaldırdı. Mäğlüm bulğança, mädäniät könnäre qısalarında Tara şähärendä ütkäreläçäk balalar cır konkursına xätta üzäktän 600 çaqrım yıraqlıqtağı Ust'-İşem rayonı awıllarınnan da kilergä cıyınalar ide. Ni säbäptän mondıy kötelmägän üzgäreş, digän sorawğa, Ol'ğa Kuleşova, byudjet üzgärde, şunlıqtan eş plannarın yañadan qarap çığarğa turı kilä, dip cawap birde.

Bu xälne tögälräk açıqlaw öçen min mädäniät Ministrlığına da möräcäğät ittem. Ministrlıqnıñ milli oyışmalar belän eşläwçe bülege baş belgeçe Natal'ya Rıbakova da, finans qıyınçılığı kilep çıqtı, şulay da ütkärmi qala almıybız, mädäniät könnäre köz köne hiçşiksez bulaçaq, dide.

Şulay itep, xäzergä tatar mädäniäte könnäre bulmıy qaldı. Wäğdä itelgän waqıtqa-közgä aqça tabılırmı, älegä äytüe qıyın.

Rozaliä Sayganova, Omski

XS
SM
MD
LG