Accessibility links

якшәмбе, 11 декабрь 2016, Казан вакыты 07:10

“Äkiät” tatar qurçaq teatrınıñ yaña binası yanında balalar parkı da salınaçaq


Waqıtında dönyada berdän – ber “Äkiät” tatar qurçaq teatrı binası Qazannıñ 1000 yıllığın bäyräm itügä äzerlek maqsatınnan tözeläçäk obyektlar programmasına kertelgän bulsa da, teatrnıñ yaña binası tözelmi qaldı. Şunnan soñ Prezident Mintimer Şäymiev üzeneñ wäğdäsen istä totıp, yubiley planınnan töşep qalğan qurçaq teatrın tözüne üz qulına aldı. Häm uzğan yılnıñ noyäber ayında teatr binasınıñ eskiz häm maketları Qazan Kirmänendä Prezident qatnaşlığında tikşerelde.

Ul waqıtta qurçaq teatrınıñ yaña binası öçen urınnı Mintimer Şäymiev üze saylağan ide. Häm ul Mullanur Vaxitov häykäle belän Ermitaj baqçası arasında Nekrasov uramınıñ asqı öleşendä tözelergä tieş ide. Ämma Qurçaq teatrı tözeläçäk älege cir satılğan bulıp çıqtı. Mäydan “Qızıl şärıq” sıra şirkäteneñ milke genä tügel, xätta anıñ ustav fondına kertelgän. Häm bezgä bilgele bulğança, Prezident bu kötelmägän xälne töşengäç şähär başlığı Qamil İsxakovqa kisken tänqit yawdırğan. Şähär citäkçelege berkem belän dä kiñäşmiçä üzäktäge iñ qimmätle häm tarixi urınnarnı säwdä kompaniälärenä satıp cibärgän bit. Häm şunlıqtan ul waqıtta balalar teatrı öçen uñaylı cir qayda bulır digän soraw açıq qaldı.

Häm menä 25 may könne Tatarstan Däwlät Şurasında Mintimer Şäymiev qatnaşlığında uzğan kiñäşmädä teatr tözeleşe öçen yaña urın bilgelände. Proyektlar häm maketlarğa bäyä birüdä Prezident belän bergä Premyer-ministr Röstäm Miñnexanov, Däwlät Sovetı räise Färit Möxämmätşin, şulay uq premyer-ministr urınbasarı, mädäniät ministrı Zilä Välieva, tözeleş, arxitektura häm toraq kommunal' xucalıq ministrı Marat Xösnullin, arxitektorlar häm "Äkiät" qurçaq teatrı direktorı Roza Cäbbarova qatnaştı.

Tatarstan mäğlümat çaraları xäbär itkänçä, qurçaq teatrı Peterburg uramında, elekkege “Pobeda” kinoteatrı qarşında urnaşaçaq. Biredä cir astında metro ütkärelgängä kürä binalar tözergä yaramağan buş cirlär bar. Menä şuşı buş urında - yaña tatar qurçaq teatrı binası tiräsendä balalar parkı da salınaçaq. Proyektlaştıru häm tözeleşneñ minimal' bäyäse 300 million sum tiräse bulaçaq ikän. Ğomumi mäydanı 10 meñ kvadrat metr bulğan binada 350 häm 150 keşelek ike zal buluı niätlänä.

Gölnaz Şäyxetdin

XS
SM
MD
LG