Accessibility links

дүшәмбе, 5 декабрь 2016, Казан вакыты 05:33

Tuqayğa bağışlanğan tağın ber kiçä ütäçäk


Ufada böyek şağirebez Ğabdulla Tuqaynıñ tuuına 120 yıl tuluğa bağışlap kiläse atnanıñ düşämbesendä, 29 may könne tağın ber zur mädäni çara oyıştırılaçaq. Bügen şuşı bäyrämne oyıştıru komitetı aña äzerlek barışın tikşergän utırışn ütkärde. Älege utırış şuşı tantana ütäçäk Başqortstan däwlät pedagogiä universitetında uzdı häm anda Başqortstan tatar milli oyışmaları wäkilläre qatnaştı.

Kiñäşmäne Başqortstan däwlät pedagogiä universitetı rektorı Rail Äsädullin açtı häm alıp bardı. “Bu çara ädäbi-muzıykal'' kiçä sıyfatında oyıştırıla häm anıñ töp öleşe universitetnıñ 400дән artıq keşe sıydırışlı zalında ütäçäk”, - dide ul.

Annan soñ süzne älege bäyräm kiçäsenä ssenariy yazuçı häm anıñ ädäbi-muzıykal'' öleşen oyıştıru öçen cawaplı bulğan tanılğan kompozitor Alik Loqmanov aldı. Anıñ süzlärençä, G.Tuqaynıñ yubiley kiçäsendä respublikanıñ qayber yuğarı citäkçeläre dä, Qazannan qunaqlar da, Başqortstan ädipläre häm ğalimnäre, tanılğan sänğät ostaları da qatnaşa.

Şulay uq bik küp uqu yortları talipları häm uquçıları cälep iteläçäk bu tantanağa. Ufadağı yuğarı uqu yortlarında belem aluçı tatar talipları, tatar gimnaziäläre uquçıları häm Stärletamak däwlät pedagogiä akademiäse, Böre däwlät pedagogiä institutı, Kuşnarenko pedagogiä uçilişçesı talipları häm uquçıları bu bäyrämneñ mädäni öleşendä üz ostalıqların kürsätäçäk.

Alik Loqmanov – Bezneñ bu bäyräm kübräk yäşlärne küzdä totıp äzerlände. Küp kenä yuğarı uqu yortlarınnan – Stärletamak, Böre pedagogiä akademiälärennän, Başqortstan däwlät universitetınnan häm Başqortstan däwlät Pedagogiä universitetınnan taliplar bula. Qazannan da qunaqlar çaqırıldı. Bezgä tanılğan dramaturg Danil Salixov belän Tuqay premiäse iäse Mösäğit Xäbibullin kilä.

Başqortstan Tatar milli-mädäni moxtariäteneñ mädäniät mäsäläläre komitetı citäkçese, tanılğan kompozitor Alik Lokmanov buldı bu. Ufada ütäçäk Ğabdulla Tuqay kiçäseneñ mädäni öleşen oyıştıru öçen cawaplı keşe bularaq, ul bu bäyrämneñ yuğarı däräcädä ütüe öçen borçıla häm şuña başqalarnıñ da bu eşkä citdi qarawın teläde ul.

Utırışta çığış yasağan professor Räif Ämirov, BDPU nıñ tatar tele kafedrası mödire Säğidulla Xafizov häm başqalar bu bäyräm kiçäsen eçtäşlekle häm küñelle itep äzerläwgä bäyle üz fikerlären häm täqdimnären äytte.

Tuqay bäyräme könne Başqortstan däwlät pedagogiä universitetı binasında böyek şağirebezneñ äsärlärennän häm cıyıntıqlarınnan, şulay uq anıñ xaqında yazılğan basmalardan kitap kürgäzmäse oyıştırılaçaq. Şulay uq G.Tuqayğa bağışlap äzerlängän räsemnär kürgäzmäse häm tatar milli kiemnäre kürgäzmäse dä eşläyäçäk.

Fänis Fätxi, Ufa

XS
SM
MD
LG